Read njo TENÜNGSANG KEN 105 Bible Online

TENÜNGSANG KEN 105 - njo bible

TENÜNGSANG KEN 105

¹Oh, KIBUBA nem tenüngsang agüjang, aser pa tenüng nung ja-ang. Nübur rongnung pa mapatem metetdakjang.

²Pa dang ken tenang, pa dang tenüngsang tenang; pa sayatenya mapa ajak indang shiang.

³Pa tenüng nung parnok sentsüwangshiang; KIBUBA bushirtem mulungjangji pelashishia lidakjang.

⁴Nenoki KIBUBA aser pa tashi bushiang; maneni pa tejak bushiang.

⁵Pai inyaka akaba pa sayatenya mapatem, pa tesüngmangtsütem, aser pa bang obendangba bilemtetang.

⁶Oh Pa tenzüker, Abraham chirtem pa teshimtet, Yakob chirtem.

⁷Asen Tsüngrem, KIBUBAji pa lir, pa obendang alima ajak nung lir.

⁸Pai pa tezüngzüktepba koba o putu meyirijangsa meyirijang dang melaogo. Aji teti pai ayutsü.

⁹ Abraham dang pa tezüngzüktepba, Isak dang pa azüngashiba;

¹⁰ Aser pai Yakob dang iba telatet ozüng akangshiba, Israel dang teti tatem maka tezüngzüktepba;

¹¹“Ni nenok nem, Kanan lima nenok shilem aser senmang asütsü agütsür” ta ashi.

¹²Kodang parnok yongsük ishika dang liasü, hau, kanga ishika aser yangji aenersa liasü.

¹³Kodang parnok kin ka nungi kin kati oli aruli asü, aser yimli ka nungi tangar nisung dangi,

¹⁴ pai nisung shinga nema parnok dak tamajung meinyakdaktsü. Hau, parnok atema pai chubatem dang tekümdangtsü ashi.

¹⁵“Ni mezüja shimtetba pur dak tekongshi, aser kü ainkartem dak tamajung teinyak.”

¹⁶ Linük madak pai ayawara jaok; Pai chiyungtsü takaba ajonga raksatsü;

¹⁷ Pai parnok jakdang nisung ka yok; Yosef alar asütsü yoka liasü.

¹⁸ Pa tetsüng yinzü agi parnoki yirutsü; Pa merang yinzü agi alener yutsü;

¹⁹Pa o ataloka aruba mapang matong tashi; KIBUBA o agi pa tendang.

²⁰ Chubai pa chiok, oda kintem madak yimsüsüri, pa nüji küma yok, aser pa nüji küma chiok.

²¹ Pai pa chuba kidang kibur kümdaktsü, aser alima ajak madak yimsüsür kümdaktsü.

²²Pa sünütsüsa tongtipur sayutettsü, aser tatartem dang shisatsü sayutsü asoshi.

²³ Idangji Israel ano Ijipi aru; aser Ham lima nung Yakob ali.

²⁴ Pai pei nübur jenti züindaktsü, aser parnok anemertem dang nungi tashi taitba parnok kümdaktsü.

²⁵Parnoki par nübur sempadaktsütsü, par tenzüker dang külakkübonga inyakdaktsütsü pai parnok mulungjang melenshitsü.

²⁶ Pai pa tenzüker Mosa, aser pai shimtetba Aron yok.

²⁷Parnoki pa temaitsütem parnok rongnung yutsü, aser Ham lima nung sayatenyatem inyak.

²⁸ Pai tammang yok, aser alimaji ammang kümdaktsü; saka parnoki pa o manga.

²⁹ Pai parnok tzü azü kümdaktsü, aser parnok angotem südaktsü.

³⁰ Parnok linük allu agi metembang, parnok chuba ki tashi nung.

³¹ Pai jembi, aser manga telok aru, aser parnok lima ajak nung azüpong poktetdaktsü.

³² Tzünglu melen pai parnok nem rürlung agütsü, aser parnok li nung milak adokdaktsü.

³³Pai parnok tsükmenatzü aser munguzünu südaktsü; aser parnok lima süngdongtem raksatsü.

³⁴ Pai jembi, aser süngkusen aru, aser mezüngdangteti menjang serapong adok.

³⁵Parnok li nung süngolio ajak chiadok, aser parnok ali nungi adokba süngjang chiadok,

³⁶ Pai ano parnok lima mezüng asoba ajak tepset. Ijip nunger kibongtem ajak nungi.

³⁷ Idangji pai taribi aser hon den Israel anitet; aser pa kin rongnung shinga memetsüdak.

³⁸Parnok aenshia aodang Ijip pela-a liasü; kechiyong parnok madak tetsübu agi tonga liasü.

³⁹ Tetongdangtsü asoshi pai mepet agi sübangdaktsü; aser aonung tesangwa asoshi mi agütsü.

⁴⁰ Parnoki meshi, aser pai opiya ozü bener arutsü; aser anüng nungi chiyungtsü agi pai parnok tiptemdaktsü.

⁴¹ Pai lung pokmadaktsü, aser tzü yima adokdaktsü; parnok lisem lima nung ayong ama yimdaktsü.

⁴²Kechiyong pai pa temeshi o, aser pa tenzüker Abraham bilemtet.

⁴³Aser pai pei nübur tepela agi anitet, aser pai shimtetba pur ken tena anitet.

⁴⁴ Aser pai parnok nem kintem linük agütsü; Nisungtemi züsentetba parnoki agi.

⁴⁵Angji parnoki pa telatet ozüngtem ayutsü, aser pa ozüngtem benshitsü; KIBUBA sangang.