Read njo TENÜNGSANG KEN 106 Bible Online

TENÜNGSANG KEN 106 - njo bible

TENÜNGSANG KEN 106

¹ Nenoki KIBUBA sangang, Oh KIBUBA nem tenüngsang agüjang kechiyong pa tajung lir. Kechiyong pa temeim yimlibilem teti alir.

²Shibai KIBUBA mapa tulu indang shitettsü, mesüra pa nüngsang ajak shibai sangdongtettsü?

³Shirnoki ochiba benshir, shirnoki mapang ajak nung shitak inyaker, parnok tepelatsü.

⁴Ne nübur tsütsü, ne yimli sayudang, ni bilemtetangma, Oh KIBUBA. Oh ne tekümtet agi ni semdangangma.

⁵Angji ne teshimtetpur azükaruba ni ngutettsü, angji ne kin tepela nung ni pelaseta litettsü. Angji ne senmang den ni sentsüwangshia litettsü.

⁶Ozü tsüraburtem ama onoki temenen benshiogo, onoki tai menaogo, onoki tamajung inyakogo.

⁷ Ozü tsüraburi Ijip nung ne sayatenyatem mangatet. Parnoki ne temeim yimlibilem jenti mebilemtet; Saka tzüyim nung, oda Temerem Tzüyim nung anema apuso.

⁸Aji saka pai pa tashi tulu metetdaktsü. Pa tenüng atema nai parnok kümzük.

⁹Pai ano Temerem Tzüyim arütsü, aser aji konga adok; Anungji tzüyim ajanga moapu nung ama pai parnok anir ao.

¹⁰Parnok shibai sempa pa ket nungi pai parnok kümzük, aser tsükchir ket nungi parnok alangzük.

¹¹Tzü agi parnok anemertem mobang; parnok kata anünga maliasü.

¹² Idangjiang parnoki pa o amang; Parnoki pa nüngsang ken aten.

¹³Saka parnoki yakta pa mapatem amadok; parnoki pa shisa tajung ata-a mali.

¹⁴Saka lisem lima nung parnoki azüabunga aküm, aser lisem lima nung Tsüngrem atitang.

¹⁵Parnok temepishiba pai parnok nem agütsü; saka ano parnok madak tashitak yok.

¹⁶ Parnoki ano Mosa dak aser KIBUBAr temeshisang Aron dak tenük merem,

¹⁷Aliji lapok aser Dathan meyokadok, aser Abiramer telok nembang.

¹⁸Parnok telok nung mi ka adok; milak jagi tamajunger rongset.

¹⁹ Parnoki nashi chanu ka Horeb nung yanglu, aser mulusa-a yangluba süngyanglu noksa külem.

²⁰Yamaji Tsüngrem sentsüwangshiji, ai achiba nashi noksa asoshiji parnoki melentep.

²¹Parnok kümtettsüba, parnok Tsüngrem parnoki amadok, shibai Ijip nung mapa tulu inyak.

²²Shibai Ham lima nung sayatenya mapatem, aser Temerem Tzüyim nung tetsübutsü mapatem inyak.

²³Aji asü nung pai parnok samatsütsü ta ashi, pai shimtetba Mosai, parnok pai samaja lir ta, pa ain adokba nungi meyipdaktsütsü, pa madang tetsüngda nung noktaka ali.

²⁴ Hau, parnoki alima tajung sensatsü, parnoki pa o mamang.

²⁵Saka parnoki süki nung nemnem, aser KIBUBA ola manga.

²⁶Aji asünung lisem lima nung parnok samadaktsütsü, pai parnok madak teka mekang.

²⁷Aser oda kin rongnung pai parnok chirtem senshia odaktsütsü, aser ali nung parnok prokshidaktsütsü.

²⁸ Parnoki pei sasa Baal-peor nung aden, aser tasür dang tenlaba tepsetba achi.

²⁹Yamaji parnoki pei mapa agi pa ain adokdaktsü; aser parnok madak wara adok.

³⁰Idangji Finehas noktak, aser o bendang agütsü; aser waraji noktang.

³¹Aser teti asoshi putusa putu, parnok asoshi aji temeshiba yong ta züngshi.

³² Ano parnoki pa Meriba tzü nung ain adokdaktsü, aser parnok meji Mosa tamajung kümdaktsü.

³³Kechiaser parnoki pa tanela kua kümdaktsü, aser pai meshisadangi o jembi.

³⁴ KIBUBAi parnok dang melaba ama, parnoki nisungtem mesamadaktsü.

³⁵Saka parnok sasa kintem den meyoktep, aser parnok mapatem angazük.

³⁶Aser parnoki parnok süngyanglu tenzük; koba parnok asoshi sang ka aküm.

³⁷ Hau, parnoki parnok jabaso, aser jalatem tsüngremtem nem tenla agütsü.

³⁸Aser tai makaba zü, oda parnok jabaso aser parnok jala zü tokshi, shirnok Kanan süngyanglutem dang parnoki tenla agütsü; aser alimaji azü agi menentsü.

³⁹Yamaji parnoki pei mapatem agi menena liasü, aser parnoki inyakba nung jabujaria ao.

⁴⁰ Anungji pei nübur anema KIBUBA ain adok, aser pai pei senmang meketmeseni aküm.

⁴¹Aser pai parnok kintem ket nung agütsü, aser parnok sempartemi parnok madak yimsü asü.

⁴²Parnok tsükchirtemia parnok kangshi, aser parnok teka kübok parnok aniok.

⁴³Aiben pai parnok kümzük; saka parnok shisatsü nung parnok tashi manga liasü, aser parnok tai agi parnok tekübok kümdaktsü.

⁴⁴Aji saka, kodang pai parnok ayimtenba angashi, pai parnok timtem reprang.

⁴⁵Aser parnok asoshi pai pei tezüngzüktepba bilemtet, aser pa temeim yimlibilem tulu yari pai temulung meyip.

⁴⁶Shirnoki parnok pur ao, pai parnok ajak parnok dang aochitsüsa kümdaktsü.

⁴⁷ Onok kümzükang, Oh KIBUBA ozü Tsüngrem, aser ne temeshi tenüng nung tepela sayutsü, aser ne nüngsang nung takok angutsü, kin rongnungi onok anitenang.

⁴⁸KIBUBA, Israel Tsüngrem moajang, putusa putu tashi, aser nisung ajaki, “Amen” ta shidakjang Nenoki KIBUBA sangang.