Read njo TENÜNGSANG KEN 107 Bible Online

TENÜNGSANG KEN 107 - njo bible

TENÜNGSANG KEN 107

¹ Oh KIBUBA nem tenüngsang agüjang; kechiyong pa temeim yimlibilem teti lir.

²KIBUBAi alangtetba purtemi yamaji shidakjang, shirnok pai anemer ket nungi alangzük;

³aser linüktem nungi aniten. Anüdoklen nungi aser anüolen nungi, Anüdoklentip aser anüolentip nungi aniten.

⁴Parnok arem nung azüngmeyakdak nemzü; parnoki nisung aliba yimti mangu.

⁵Parnok yaseta aser tzüraseta liasü, parnok dak tanela lula-a kümadok;

⁶Idangji parnok timtem nung parnoki KIBUBA dang ayimten, aser pai parnok timtem nungi kümzük.

⁷Parnok nisung aliba yimti-i aittsüsa, pai ano temetongba lenmangi ani.

⁸Pai ajungba asoshi, aser nisung chirtem dang pai tesüngmangtsü mapa asoshi, nisungtemi KIBUBA tenüng sangdakjang!

⁹Kechiyong tzüra-a aliba tanela pai tzüra temdaktsür; aser yaseta aliba tanela pai tajung agi süngdaktsür.

¹⁰Kar tammang nung aser tasü akhüm nung, timtem toushi aser merang agi alener mena alir.

¹¹Kechiaser parnoki Tsüngrem o anema apuso, aser Tematiba shisa tajung sensatsü.

¹²Parnok mulungjang mapa tasak inyakba agi kokrokdakja liasü. Parnok lao, aser teyaritsü shinga maliasü.

¹³Idangji parnok timtem nung parnoki KIBUBA dang ayimten, aser pai parnok timtem nungi parnok kümzük.

¹⁴Pai parnok ammang nungi aser tasü akhüm nungi anitet, aser parnok talenba raktangtsü.

¹⁵Pai ajungba asoshi, aser nisung chirtem dang pa tesüngmangtsü mapatem asoshi KIBUBA tenüng sangang!

¹⁶Kechiyong pai yongmenyin süngkhüm raksatsü, aser merang tartangtsü leptangtsü.

¹⁷Parnok tamajung mapayong, aser parnok tai menaba yong, tamashi, aser timtem toushi nung lir.

¹⁸Chiyungtsü tapu ajak parnoki aginü; aser parnok tasü süngkhüm anasa aru.

¹⁹Idangji parnok timtem nung parnoki KIBUBA dang ayimten, aser pai parnok tejashi nungi kümzük.

²⁰Pai pa o yok, aser parnok anebtsü aser parnok tesamatsü nungi kümzük.

²¹Pai ajungba asoshi, aser nisung chirtem dang pa tesüngmangtsü mapa asoshi, nisungi KIBUBA sangdakjang!

²²Parnok dang tenüngsang tenla tenladakjang, aser pa mapatem ken tena sangdakjang.

²³Shirnok rong nung tzüyimi alur, oda tzü tulu nung shishilemba asür;

²⁴Parnoki KIBUBA mapatem, aser pa tesüngmangtsütem tzüyim nung angur.

²⁵Kechiyong pai melar, aser yipru mopung adokdaktsür, koba agi iba nungi tzüsem adokdaktsür.

²⁶Parnok anüngi atur, tanaben parnok tzüyim taroki alur; timtemba yong parnok tanela yimsa-a aor.

²⁷Külen küleni parnok naizür, aser yi pur ama mangmanger, aser parnok kechiang mesayangi liasü.

²⁸Idangji parnok timtem nung parnoki KIBUBA dang ayimten, aser pai parnok tejashi nungi parnok anitet.

²⁹Pai yipru süngjema kümdaktsür, anungji iba tzüsem marakzüi aküm.

³⁰Idangji parnok pelatep, kechiaser parnok ajemajema ali. Anungji pai parnok yongyaba tejenokdaki anir aru.

³¹Pai ajungba asoshi, aser nisung chirtem dang pa tesüngmangtsü mapatem asoshi, nisungi KIBUBA tenüng sangdakjang!

³²Nübur mungdangdak ano parnoki pa uludakjang, aser tatartem menden nung pa tenüng sangdakjang.

³³Pai ayongtem lisem li kümdaktsür, aser yima aliba ayongtem anendaktsür.

³⁴Temo aliba li agi metsü li kümdaktsür, kechiyong yangji shirnok ali parnok tamajung mapa yong lir.

³⁵Pai lisem limaji ayong agi sünga kümdaktsü, aser ali takong agi tzü ayong kümdaktsür.

³⁶Aser yangji yaseta alir pai lidaktsür. Angji parnoki talitsü yimti yanglur.

³⁷Aser moapu nung metsü proka, aser tsükmenatzü atemtsü, koba agi süngjang tangtsür.

³⁸Pai ano parnok moatsür, aji asünung parnok jenti rendaktsür; aser pai parnok kiset shiruru ajema mekümdaktsür.

³⁹Tanaben tekangshi, timtem aser tejashi ajanga, parnok ishiba aser mokrema küma lir.

⁴⁰Pai tongtipur dak sensamasa meküploktsür, aser kong lenmang maka yangji parnok nemzüdaktsür.

⁴¹Aji saka sensakertem timtem toushi nungi pai temaleni ajungkettsür, aser san telok ama par kinungertem kümdaktsür.

⁴²Ochishiri aji angutsü aser pela-a alitsü, aser tamajunger ajaki pei tebang shibangtsü.

⁴³Shir shisa aka, item mapa nung temulung agütsüdakjang, aser parnoki KIBUBA temeim yimlibilem indang shisadangtsü.