Read njo TENÜNGSANG KEN 108 Bible Online

TENÜNGSANG KEN 108 - njo bible

TENÜNGSANG KEN 108

¹Oh Tsüngrem, kü mulungjang akang akanga lir. Ni kongki atemtsü aser ken atentsü.

²Sakang, tzürang kongki aser tawaba kongkitem! Anepdangji ni sakdaktsütsü.

³Oh KIBUBA, nübur rongnung ni ne nem tenüngsang agütsütsü; aser kin rongnung ni tenüngsang ken atentsü.

⁴Kechiyong ne temeim yimlibilem anüng tanga talangba lir, aser ne tamang katetbai mepettem atonger.

⁵Oh Tsüngrem, anüngtem temalen tonga na uludakjang; aser ne sentsüwangshi alima ajak madak lidakjang!

⁶Angji nai meimbatem kümzüktettsü, ne teka tajichi agi kümzükang, aser onok dang langzüangma.

⁷Tsüngremi pa temeshidak jembiogo; “Ni Shekem lemsatsü; aser Sukkot Lenten kü nübur nem lemsatsütsü.

⁸Gilead kü meyong lir; Manase kü meyong lir; kü kolak tongtangtsü Efraim lir, Yihuda kü chuba nüsong lir.

⁹Moabji kü teshitokba susa lir; Edom madak ni kü tsüngsem ajemshitsü; Filistia madak ni ayimtentsü.”

¹⁰Shibai ni atsübanga aliba yimti-i anir aitsü? Shibai ni Edomi anir ao?

¹¹Oh Tsüngrem, nai onok endoktsü masü no? Oh, Tsüngrem, na onok temeranger telok den maor.

¹²Anemer anema onok nem teyari agüjang. Kechiyong nisunger teyaribo amajok dang lir.

¹³Tsüngrem ajanga onoki tasü ita inyaktsü. Kechiyong ozü anemertem ajemzüka yoksangji pa lir.