Read njo TENÜNGSANG KEN 116 Bible Online

TENÜNGSANG KEN 116 - njo bible

TENÜNGSANG KEN 116

¹Ni KIBUBA meimer, kechiaser pai kü ola aser kü temepishiba angashia lir.

²Kechiaser pai kü dangi pa tenarong shitsür. Aji asünung kopiga ni taküm lidir, papigaji ni pa dang ajatsü.

³Tasüba lisü agi ni mesangbangogo, Sheol tekangshi agi kü dak tongogo. Ni timtem aser tejashi nguogo.

⁴Idangji ni KIBUBA tenüng nung aja, “Oh KIBUBA, ni ne dang mepishir, kü taküm kümzükangma.”

⁵KIBUBA taochi lir, aser temeshi lir. Hau, asen Tsüngrem yimlibilem lir.

⁶KIBUBAi tongmelanger awabanga ayur. Ni tajemzük kümdakja liasü, aser pai ni kümzük.

⁷Ne anisüngzükdaki meyipang, Oh kü taküm. Kechiyong KIBUBAi ne den junga benshiogo.

⁸Kechiyong tasü nungi kü taküm, nüktzü ayimba nungi kü nük, aser laoba nungi kü tetsüng, nai kümzük,

⁹Ni KIBUBA madang, taküm alir lima nung jajatsü.

¹⁰“Ni kanga kangshia liasü” ta ni shiaka ni tamang agi;

¹¹ni kü taoksa nung ashi, “Nisung ajak tiyazürtem lir.”

¹²Ni KIBUBA nem kü dang ajungba ajak asoshi kechi agütsütsü?

¹³Ni tekümtet marok agitsü, aser KIBUBA tenüng nung ajatsü.

¹⁴Pa nübur ajak matsüngdang ni KIBUBA dang tatemzükba agütsütsü.

¹⁵KIBUBA matsüngdang pa temeshipur asüba senti lir.

¹⁶Oh, KIBUBA, atangji ni ne tenzüker lir; ni ne tenzüker, ne kilitsür jabaso lir; nai kü alar tia salatsüogo.

¹⁷Ni ne nem tenüngsang agütsüba tenla tenlatsü, aser KIBUBA tenüng nung ajatsü.

¹⁸Pa nübur ajak matsüngdang; Ni KIBUBA nem kü tatemzükba agütsütsü.

¹⁹KIBUBA ki kilempok nung, Oh Yirusalem, ne tiyong rongnung nenoki KIBUBA sangang.