Read njo TENÜNGSANG KEN 118 Bible Online

TENÜNGSANG KEN 118 - njo bible

TENÜNGSANG KEN 118

¹ Oh KIBUBA nem tenüngsang agüjang, kechiyong pa tajung lir; pa temeim yimlibilem teti tatem maka alir.

²Tang Israeli, “Pa temeim yimlibilem teti tatem maka alir,” ta shidakjang.

³Tang Aron kidongi, “Pa temeim yimlibilem teti tatem maka alir,” ta shidakjang.

⁴Tang KIBUBA tsüburtemi, “Pa temeim yimlibilem teti tatem maka alir,” ta shidakjang.

⁵Kü tejashi nung ni KIBUBA dang aja. KIBUBAi kü dang langzü aser ni talidak tuluka nung toktsü.

⁶ KIBUBA kü tsütsü lir; ni metsübutsü; nisungi kü dang kechi inyaktettsü?

⁷KIBUBA kü tsütsü ni yaritsü lir. Aji asünung shirnoki ni sempar, parnok madak takokba nung ni reprangtsü.

⁸Nisung dak tamang akadang nungibo, KIBUBA dak temulung alem tajungba.

⁹Tongtipur dak tamang akadang nungibo, KIBUBA dak temulung alem tajungba lir.

¹⁰Kin ajaki ni meketbangogo; KIBUBA tenüng nung parnok ajak ni leptoktsü.

¹¹Parnoki ni meketbangaka, hau, lungbangaka, KIBUBA tenüng nung ni parnok samatsütsü.

¹²Ninang amai parnoki ni metembang; ai arongba mi ama parnok jangrua lir. KIBUBA tenüng nung ni parnok samatsütsü.

¹³Ni laotsüsa nungokja liasü, saka KIBUBAi ni yari.

¹⁴ KIBUBA kü tashi aser kü ken lir; pa kü tekümtet kümogo.

¹⁵Temeshi pur süki nung washiba aser tekümzük ola lir; “KIBUBA teka tajichi agi takok inyaker.

¹⁶KIBUBA teka tajichi ajungketa lir; KIBUBA teka tajichi agi takok inyaker.”

¹⁷Ni masütsü, saka taküm alitsü, aser KIBUBA mapatem sangdongtsü.

¹⁸KIBUBAi ni kanga arürtsü; saka pai ni tasüba nem magütsü.

¹⁹Temeshiba süngkhüm kü nem lapokjangma; ajagi ni aitsü, aser KIBUBA nem tenüngsang agütsütsü.

²⁰Ibai KIBUBA süngkhüm lir; temeshipur aji agi aitsü.

²¹Ni ne nem tenüngsang agütsütsü, kechiyong nai kü dang langzü, aser na kü tekümtet küma lir.

²² Kisürtemi koba lung magizük, kinük nung tongtiba küma lir.

²³ Ibai KIBUBAi inyakba mapa lir; asen nükdang ibai tesüngmangtsü.

²⁴KIBUBAi yangluba anogoji ibai lir, asenoki pelateptsü aser iba nung pela-a alitsü.

²⁵ Tang kümzükang, onoki ne dang mepishir, Oh KIBUBA. Oh KIBUBA, onoki ne dang mepishir, tang takok agüjangma.

²⁶ KIBUBA tenüng nung shiba arur pa temoatsüba süang; KIBUBA ki nungi onoki na moatsütsü.

²⁷KIBUBAji Tsüngrem lir, aser pai asenok nem tesangwa agütsü. Lisü agi tetepsettsü tenla alenang; oda tenladak tezü dakji.

²⁸Na kü Tsüngrem lir, aser ni ne nem tenüngsang agütsütsü; na kü Tsüngrem lir, ni na ajungkettsü.

²⁹Oh KIBUBA nem tenüngsang agüjang; kechiyong pa tajung lir; pa temeim yimlibilem teti tatem maka alir.