Read njo TENÜNGSANG KEN 119 Bible Online

TENÜNGSANG KEN 119 - njo bible

TENÜNGSANG KEN 119

¹Shirnok lenmang nung tamayazür lir, shirnoki KIBUBA ozüng nung jajar parnok temoatsüba.

²Shirnoki pa temelabatem benshir, Shirnoki temulung ajak agi pa bushir, parnok tepelatsü.

³Hau, parnoki memeshiba meinyaker; Parnoki pa lenmang nung jajar.

⁴Nai ne ochi ozüngtem, onoki meranga benshitsü onok dang mela.

⁵Oh, telatet ozüngtem benshitsü, kü lenmangtem akanga yanglua lilasang!

⁶Kodang ne temelaba ozüngtem ajak nung ni akhümtsübua lidir, Idangji ni akseta malitsü.

⁷Kodang ne temeshi obendang ni angazükdir, ni ne nem tamayazüba mulungjang agi tenüngsang agütsütsü.

⁸Ni ne ozüngtem benshitsü; Oh, ni bendanga senzüka teyutsüma.

⁹Asangur nisungi pei lenmang koda merüka yutettsü? Ne o ama aji mita aliba agi.

¹⁰Kü mulungjang ajak agi ni na bushiogo; oh ne temelaba ozüng nungi ni nemzüa tuodaktsü.

¹¹Ni na anema temenen memenatsü, ne o kü mulung nung rizünga lir.

¹²Na temoatsü lir, Oh KIBUBA, Kü dang ne ozüngtem sayuangma.

¹³Ne bang nungi ne yimsü ozüng ajak ni kü bang agi sangdonger.

¹⁴Ni ne ozüngtem nung, rongsen ajak nung ama kodaka pelar, patakaji pelaseta alir.

¹⁵Ni ne ozüng nung shisadanger, aser ne lenmang nung akhümtsübua lir.

¹⁶Ni kü sasa ne telatet ozüng nung pelar; ni ne o mamatsü,

¹⁷Ne tenzüker den, ni taküm litettsüsa, taochi sayua benshiangma.

¹⁸Ne ozüng nungi tesüngmangtsü mapatem, ni ngutettsüsa, nai kü tenük lapokjangma.

¹⁹Alima nung ni aener ka ama lir, ne temelabatem kü dang nungi temiimma.

²⁰Ni ne yimsü-ozüng mapang ajak nung, tejangraba agi bushir.

²¹Asükümer atakatema alirtem, shirnoki ne temelabatem nungi pila-a aor, parnok nai arütsür.

²²Kü dang nungi maksü aser tatalaba agienangma; kechiyong ni ne ozüngtem benshiogo.

²³Ano tongtipuri ni anema tasa asa-a menaka, ne tenzükeri ne telatet ozüng indang shisadangtsü.

²⁴Ne kulitem ano kü tepelatsü, aser kü teshisadangbatem lir.

²⁵Kü nelai aut nung ondaka lir; ne o amato ni roka asoa kümdakjang.

²⁶Ni kü lenmangtem metetdaktsü, aser nai kü dang langzü; nai kü dang ne ozüngtem sayuangma.

²⁷Kü nem ne ozüngtem lenmang angatettsüsa kümdakjang. Anungji ni ne tesüngmangtsü mapatem indang shisadangtsü.

²⁸Tejashi agi ni kokroka lua lir. Ne o amato ni mesoangma.

²⁹Tiyazü lenmangtem ni nungi talangka pila-a tokjang, aser aochia ne ozüng kü dang mela-angma.

³⁰Temulung alemba lenmang ni shimtetogo. Kü madang ni ne yimsü ozüng yua lir.

³¹Ne ozüngtem dak ni azüiter; Oh KIBUBA, ni maksüa teyutsüma.

³²Kodang nai kü mulungjang uludaktsüdir, ni ne temelaba lenmangi asemtsü.

³³Oh KIBUBA, ne telatet ozüng kü dang sayuangma; aser aji ni tatem tashi benshitsü.

³⁴Kü nem tangatetba kua, aser ni ne ozüng ayutsü. Hau, ni kü mulungjang ajak agi aji benshitsü.

³⁵Ne ozüng lenmang nung ni aniang, kechiyong iba nungji ni pelar.

³⁶Ne kulitem tsütsü kü mulungjang shijang. Aser azüabungba len masü.

³⁷Amajok reprangba nungi kü tenüktem meyipa odakjang, aser ne lenmangtem nung ni saksalema kümdakjang,

³⁸Ne tenzüker asoshi ne tenangzükba akangshidakjang, koba ne akhümtsüburtem asoshi lir.

³⁹Maksütsü koba ni tsübur, ni nungi aenshidakjang; kechiyong ne yimsü-ozüngtem tajung lir.

⁴⁰Ajiang, ne ozüng asoshi ni yongya-a liogo; ne temeshiba nung ni roka asodakjang.

⁴¹Oh KIBUBA, ano ne temeim yimlibilem, oda ne tekümzük ne o amato kü dangi arudakjangma.

⁴²Anungji ni atalatsür dang telangzüba ka akatsü; kechiyong ni ne o nung temulung alemer.

⁴³Kü bang nungi atangji o khenyongi bener tuoma; kechiyong ne obendang nungi ni imla-a liogo.

⁴⁴Anungji ni maneni ne ozüng, teti tatem makai benshitsü.

⁴⁵Aser ni matitaki jajatsü; kechiyong ni ne ozüngtem bushi.

⁴⁶Ano ni chubatem madang ne ozüngtem jembitsü, aser aaka malitsü.

⁴⁷Ni kü sasa ne temelabatem koba ni meimer, iba nung pelatsü.

⁴⁸Ne temelabatem, koba ni meima ali, ano kü teka mekangtsü, aser ne telatet ozüng nung ni shisadangtsü.

⁴⁹Ne tenzüker dang ne oji bilemtetangma, kechiaser nai kü nem imladaktsü.

⁵⁰Kü timtem nung ibai kü tesünep lir. Kechiyong ne o agi ni roka asodaktsü.

⁵¹Asükümeri ni kanga sensatsü, aji saka ne ozüng nungi ni meyipa mao.

⁵²Alemli nungi ni ne ozüngtem bilemteta lir, Oh KIBUBA, aser kü sasa sünepdaktsü.

⁵³Tamajungeri ne ozüng senzüka yutsüba dang, ni kanga jashia mit adok.

⁵⁴Kü temeshi aeni aoba kidang ne telatet ozüngtem kü ken lir.

⁵⁵Ni ne tenüng aonung bilemtet, Oh KIBUBA, aser ne ozüng benshiogo.

⁵⁶Ni ne ozüngtem benshiba yong, iba temoatsü kü dangi aruogo.

⁵⁷KIBUBA kü shilem lir; ni ne otem benshitsü nangzükogo.

⁵⁸Kü mulungjang ajak agi ne dang mepishir; ne o amato kü dang aochiangma.

⁵⁹Kodang Ni kü lenmang shisadang, ne ozüng leni kü tsüng meyip.

⁶⁰Ne temelaba benshitsü, ni ilunger, aser menua malir.

⁶¹Tamajunger lisü agi ni naibangaka; saka ni ne o mamadok.

⁶²Ne temeshi yimsü ozüngtem ama, ni ne nem tenüngsang agütsütsü asoshi ayatrem nung shishitsü.

⁶³Shirnoki na akhümtsübur aser shirnoki ne ozüngtem benshir, parnok ajak medemerji ni lir.

⁶⁴Oh KIBUBA, alima ne temeim yimlibilem agi sünga lir; Kü dang ne telatet ozüngtem sayuangma.

⁶⁵Oh KIBUBA, ne o amato, nai ne tenzüker den junga benshiogo.

⁶⁶Obendang tajung aser temetetba shisatsü kü dang sayuangma. Kechiyong ne temelaba ozüng nung ni amanger.

⁶⁷Ni timtem agi metongi alidang, ni aibelena ao. Saka tangbo ni ne o benshir.

⁶⁸Na tajung lir, aser tajung inyaker; Kü dang ne telatet ozüngtem sayuangma.

⁶⁹Asükümertemi ni atema tiyazü shiogo. Saka ku mulung ajak agi ne ozüngtem benshitsü.

⁷⁰Parnok mulungjang temo ama tekaka lir. Saka kü mulungjang ajak agi ni ne ozüng benshitsü.

⁷¹Ne telatet ozüngtem ni angazüktsüsa, ni timtemdaktsübaji ni atema tajung lir.

⁷²Hon aser taribi meyirijang dang nungi ne bang ozüng kü tsüngdang tajungba lir.

⁷³Ne ket agi ni yanglu aser ni renemtsü. Ne temelaba ozüng ni angazüktsüsa, kü nem tangatetba kua.

⁷⁴Shirnoki ne akhüm tsübur parnoki ni angutsü aser pela-a alitsü. Kechiaser ne o nung ni imla.

⁷⁵Ni metet, Oh KIBUBA, oda ne o bendang ochi lir, aser oda tajung atema nai ni timtemdaktsü.

⁷⁶Ni ne dang mepishir, ne tenzüker dang ne o amato, ne temeim yimlibilem kü tesünep asoshi sangma.

⁷⁷Ni taküm litettsü ne taochi kü dangi arudakjang. Kechiyong ne ozüng kü tepela asoshi lir.

⁷⁸Asükümer akdakjang. Kechiyong parnoki ni tai agi endoktsü. Saka ne ozüng nung ni shisadangtsü.

⁷⁹Ne akhümtsüburtem kü dangi meyipdakjangma, aser parnoki ne ozüngtem metettsü.

⁸⁰Ne telatet ozüng nung kü mulungjang shitak lidakjangma. Angji ni aaka malitsü.

⁸¹Ne tekümzük asoshi kü nela lula-a akümer; saka ne tenangzükba nung ni imlar.

⁸²Ne tenangzükba reprangra kü tenük chilar, “Nai kodang ni süneptsütsü?”

⁸³Kechiyong mokozü nung yi shiküp bongdang ama ni küma lir. Aji saka ni ne telatet ozüng mamar.

⁸⁴Ne tenzükeri kwinü aremzüktsü? Ni rishikangshir dak nai kodang o bendang agütsütsü?

⁸⁵Asükümeri ni asoshi kangla tua lir, parnoki ne ozüng nung malir.

⁸⁶Ne temelaba ozüng ajak atangji lir; parnoki aibelena ni rishikangshir; nai ni yariangma.

⁸⁷Parnoki ni ali nung tesamatsürdang lir; saka ne ozüng ni senzüka metoktsü.

⁸⁸Ne temeim yimlibilem yari ni rokasoa kümdakjangma, Angji ne bang ozüng ni bilemtettsü.

⁸⁹Oh KIBUBA, teti tatem maka, ne o kotak nung akanga noktaka lir.

⁹⁰Ne temulung alemba tenangzükba putu ajak dangi lir. Nai alima yanglur, aser aji akanga noktaka alir.

⁹¹Ne yimsü ozüng amato parnok tanü noktaka lir; kechiyong ajak ne tenzükertem lir.

⁹²Ne ozüngji kü tepelatsüsa melilasang, ni kü timtem nung samar lila.

⁹³Ni ne ozüng kodanga mamatsü; kechiyong item jagi nai ni kümzüka ayutsü.

⁹⁴Ni ne meyong lir, ni kümzükangma; kechiyong ni ne ozüng bushi.

⁹⁵Tamajungeri ni samatsütsü ni ata-a ali; saka ni ne ozüngtem bilemdangtsü.

⁹⁶Mapa ajak atema tatem kabosa ni angur; saka ne temelaba ozüngtembo onsara tesadem lir.

⁹⁷Oh, ni ne ozüng koda meimer! Anogo tepiyong ya kü teshisadangba lir.

⁹⁸Ne temelaba ozüngtem agi, Kü tsükchirtem dang nungi ni shisa takaba kümdaktsür; Kechiyong itemji teti kü den lir.

⁹⁹Kü tesayur ajak dang nungi ni tali tangatetba lir; kechiyong ne ozüngtemji kü teshisadangba lir.

¹⁰⁰Tambur dang nungi ni tangatetba lir, kechiyong ni ne ozüngtem benshir,

¹⁰¹ne o benshitettsü asoshi, ni kü tsüng tamajung lenmang nungi agien.

¹⁰²Ne yimsü-ozüng nungi ni meyipa mao, kechiyong nai kü dang sayu.

¹⁰³Ne otem kü bang dang koda tanang lir! Hau, kü bang dang mojitzü dang nungi tanangba!

¹⁰⁴Ne ozüngtem ajanga ni tangatetba angur. Aji asünung ni tiyazü mapa sempar.

¹⁰⁵Ne o kü tsüng asoshi milen, aser kü lenmang asoshi tesangwa lir.

¹⁰⁶Ne temeshi yimsü ozüng benshitsü. Ni azüngashiogo, aser aji ni inyaktsü.

¹⁰⁷Ni kanga timtema lir, Oh KIBUBA, ne o amato kü nem taküm agüjang.

¹⁰⁸Oh KIBUBA, kü bang nungi mulungben tenla agizükangma, aser ne o bendang kü dang sayuangma.

¹⁰⁹Kü taküm maneni kü ket nung lir; aji saka ni ne ozüng mamar.

¹¹⁰Tamajungeri ni asoshi sang ka soa lir; aji saka ne ozüng nungi ni mashileni mao.

¹¹¹Ne ozüngtem teti asoshi ni senmang agia lir. Kechiyong itemji kü mulungjang tepela lir.

¹¹²Ne telatet ozüng benshitsü kü mulungjang ne tsütsü shia lir, oda tatembang tashi.

¹¹³Temulung anasüpur ni sempar; saka ne ozüng ni meimer.

¹¹⁴Na kü tatsükokdak, aser kü jong lir; ni ne tenangzükba nung imlar.

¹¹⁵Ni nungi aenshiang, nenok tamajung inyakertem; angji ni kü Tsüngrem temelaba ozüng benshitettsü.

¹¹⁶Ne o amato ni ajungketang, angji ni taküm litettsü; aser kü teimla asoshi ni maksüa tetoktsüma.

¹¹⁷Nai ni atsümesoang, aser ni kümzüktsü, aser maneni ne telatet ozüng asoshi akhüm tsübua alitsü.

¹¹⁸Ne telatet ozüng nungi aibelena aor ajak, nai tazüngla kümdaktsü; kechiyong parnok tekülakbaji tagidak maka.

¹¹⁹Alima nung tamajunger ajak, rüja ama nai tatem kümdaktsür; aji asünung ni ne ozüngtem meimer.

¹²⁰Ne tsüngken tsübu agi kü shi atentener; aser ni ne ozüng tsüngken tsübur.

¹²¹Ni ochi aser shitak inyakogo; ni kangshir nem ni tetoktsüma.

¹²²Kü dang ne o teti asoshi züngzükangma, mezümekümeri ni tekangshidaktsüma.

¹²³Ne tekümzük asoshi aser ne temeshi tenangzükba ataloktsü asoshi, kü nüki reprangtsü mokoki akümer.

¹²⁴Ne temeim yimlibilem yari ne tenzüker dang inyakangma, aser ne telatet ozüng kü dang sayuangma.

¹²⁵Ni ne tenzüker lir, kü nem tangatetba kua; angji ni ne temelaba ozüng metettsü akoktsü.

¹²⁶Ibai KIBUBA asoshi inyaktsü mapang lir; kechiyong parnoki ne ozüng raksatsüogo.

¹²⁷Aji asünung ni ne temelaba ozüng meimer. Hon dang nungi, hau, hon tajung dang nungi tali meimer.

¹²⁸Aji asünung kechisarena nung ne temelaba ozüng ajak shitak ta ni züngshir; aser tiyazü lenmang ajak ni sempar.

¹²⁹Ne temelaba ozüngtem tesüngmangtsü lir. Aji asünung ni itemji benshitsü.

¹³⁰Ne otem lapokba agi tesangwa agütsür. Iba yagi tongmelanger nem tangatetba agütsür.

¹³¹Ni tangu satema tebang kar ata-a ali; kechiyong ni ne temelaba ozüngtem yongya-a liasü.

¹³²Ne tenüng meimer dang nai inyakba ama, Na kü dangi meyipang, aser kü dang aochiangma.

¹³³Ne o nung kü tsüng jenjang yanglujang; aser kü madak tai temenen tashi telidaktsüma.

¹³⁴Nisungi kangshiba nungi ni alangzükangma. Anungji ni ne temelaba ozüngtem benshitsü.

¹³⁵Ne tenzüker madak ne tejak yalokjangma; aser ne telatet ozüng kü dang sayuangma.

¹³⁶Kü tenük nungi nüktzü ayong ama yima alur, kechiaser parnoki ne ozüng mebenshir.

¹³⁷Oh KIBUBA, na temeshi lir, aser ne obendang ochi lir.

¹³⁸Temeshiba nung aser temulung alemba ajak nung, nai ne kulitem melaogo.

¹³⁹Kü tejangraba agi ni chimar, kechiaser kü anemertemi ne otem amadok.

¹⁴⁰Ne tenangzükbatem tendangogo aser atangji. Aji asünung ne tenzükeri aji meimer.

¹⁴¹Ni tilar, aser mezüngmeshiba nisung, aji saka ne ozüngtem ni mamar.

¹⁴²Ne temeshiba teti tatem maka temeshi, aser ne ozüngtemji atangji lir.

¹⁴³Timtem aser touashiba agi kü dak atong; aji saka ne temelaba ozüng kü tepela lir.

¹⁴⁴Ne temelaba ozüngtem teti tatem maka temeshi; kü nem tangatetba kua, aser ni taküm alitsü.

¹⁴⁵Kü mulung ajak agi ni ayimtener; kü dang langzüangma, Oh KIBUBA; ni ne telatet ozüng benshitsü.

¹⁴⁶Ni ne dang ayimtener; ni kümzükangma, aser ni ne temelaba ozüng benshitsü.

¹⁴⁷Ni mesangwa dang shishir, aser teyari asoshi ayimtener; ni ne o nung imlar.

¹⁴⁸Ne o nung ni shisadangtsü asoshi, kü tenük aonung saksalema alir.

¹⁴⁹Ne temeim yimlibilem yari kü ola angangma, Oh KIBUBA, ne ochiba yari kü taküm wazüka yuangma.

¹⁵⁰Tamajung sülen anitakertemi anasa arur, saka ne ozüng nungi parnok talangka pila-a lir.

¹⁵¹Aji saka na ana nung lir, Oh KIBUBA; aser ne temelaba ozüngtem atangji lir.

¹⁵²Alemli nungi ne temelaba ozüngtem, teti asoshi nai yanglu, ta ni metet.

¹⁵³Kü timtem bilemdangang, aser ni kümzükangma; kechiyong ni ne ozüng mamar.

¹⁵⁴Kü tepu kümang, aser ni alangzükang; ne tenangzükba yari kü nem taküm agüjangma.

¹⁵⁵Tamajunger nungibo tekümtet talang nung lir; kechiyong parnoki ne telatet ozüng mebushi.

¹⁵⁶Ne taochi tulu lir, Oh KIBUBA; ne ochiba yari kü nem taküm agüjangma.

¹⁵⁷Ni rishikangshir aser kü anemer jenti lir; aji saka ne kulitem nungi ni pila-a mao.

¹⁵⁸Külaka benshirtem ni angu, aser jashia liasü; kechiaser parnoki ne o mebenshi.

¹⁵⁹Ni ne ozüng koda meimer shisadangang; Oh KIBUBA, ne temeim yimlibilem yari kü taküm wazüka yuangma.

¹⁶⁰Ne o tatokbaji atangji lir. Aser ne ochi obendang teti alir.

¹⁶¹Kecha masü nung tongtipuri ni rishikangshi; saka kü mulungjang ne o tsüngken tsübua noktaka alir.

¹⁶²Temakzükba oset angur nisung amato, ni ne ozüng nung pelaseta alir.

¹⁶³Ni tiyazü aser yazüyaponger sempar, saka ne o ni meimer.

¹⁶⁴Anogo ka nung ni tenetben ne nüng asanger; kechiaser ne ochi obendang lir.

¹⁶⁵Ne ozüng meimertem asoshi tesünep tulu lir; aser parnok temetsüdaktsü kecha maka.

¹⁶⁶Oh KIBUBA, ni ne tekümzük asoshi imla, aser ne temelaba inyakogo.

¹⁶⁷Kü nelai ne temelaba ozüng benshiogo; aser itemji kanga meimer.

¹⁶⁸Ni ne ozüng aser temelaba ozüng benshiogo; kechiyong kü lenmang ajak ne madang lir.

¹⁶⁹Oh KIBUBA, ni ayimtenba na anasa arudakjang; ne o amato kü nem tangatetba kua.

¹⁷⁰Kü temepishiba ne madangi arudakjang; ne o amato ni kümzükangma.

¹⁷¹Kü bang agi tenüngsang adokdakjangma; kechiyong nai ne telatet ozüng kü dang sayur.

¹⁷²Kü meli agi ne o indang ken atentsü, kechiyong ne temelaba ozüng ajak temeshi lir.

¹⁷³Ni yaritsü ne teka renema lidakjangma; kechiyong ni ne temelaba ozüng shimtetogo.

¹⁷⁴Oh KIBUBA, ne tekümzük asoshi ni yongya-a liasü; aser ne ozüng kü tepelatsü.

¹⁷⁵Kü tanela taküm lidakjang, aser iba jagi ne nüng asangtsü, aser ne o bendang agi ni yaridakjangma.

¹⁷⁶Tesama san ama ni mashileni ogo; ne tenzüker bushiangma; kechiyong ne temelaba ozüngtem ni mamar.