Read njo TENÜNGSANG KEN 132 Bible Online

TENÜNGSANG KEN 132 - njo bible

TENÜNGSANG KEN 132

¹Oh KIBUBA, Dawid asoshi, pa timtem ajak, bilemtetangma.

²KIBUBA dang pai koda azüngashi, aser Yakober Tashi tulusang dang koda atemzük.

³“Atangji kü kidangi ni maitsü, mesüra kü yipten nung ontaka alitsü ni matutsü.

⁴Ni kü tenük memejangdaktsütsü, mesüra kü nükeptsü amua modaktsütsü.

⁵KIBUBA asoshi talidak ka, Yakober Tashi tulusang asoshi tekülemdak süki ka ni mangu tashi.”

⁶ Angang, aji Efrata nung liasü ta onoki angashi; onoki aji Yaar moapu nung angu.

⁷“Pa alidaki asenoki odi, pa tetsüng ajemetdak asenoki külemdi.”

⁸Aramesoang, Oh KIBUBA, ne anisüngzükdaki, na aser ne tashi tait Ozüng Süngden,

⁹ne putirtem ochiba agi sobudakjang; Ne temeshipur tepela agi washidakjang.

¹⁰Ne tenzüker Dawid atema, nai shimtetba ajak meyipa teyokma.

¹¹ KIBUBAi Dawid dang ochi nung azüngashiogo; pai iba nungi memeyiptsü; ne chuba menden manung, “Ne dak nungi jakzükba chirtem rongnung ka ni toktsütsü.

¹²Ne chirtemi kü tezüngzüktepba, aser kü kulitem koba ni sayutsü aji benshidi süra, parnok chirtem ne chuba menden nung teti mendaktsütsü.”

¹³Kechiyong KIBUBAi Zion, pa talidak asütsü pai aji shimtetogo.

¹⁴Ibai teti asoshi kü anisüngzükdak lir. Yangji ni alitsü; kechiyong aji ni aginür.

¹⁵Ni pa chiyungtsü angudak talubosa moatsütsü. Par sensaker amtsük agi tiptemdaktsütsü.

¹⁶Lar putirtem ano ni tekümzük agi sobudaktsütsü. Aser lar temeshipuri tepela agi ola tulu agi washitsü.

¹⁷ Yangji ni Dawid tezü temeshi sobudaktsütsü. Kü temeshitetsang asoshi ni milen ka renema lir.

¹⁸Par tsükchirtem maksü agi ni abendaktsütsü; saka pa dak pei chuba korang sentsüpranga alitsü.