Read njo TENÜNGSANG KEN 135 Bible Online

TENÜNGSANG KEN 135 - njo bible

TENÜNGSANG KEN 135

¹Nenoki KIBUBA sangang. Nenoki KIBUBA tenüng sangang; pa sangang, Oh nenok KIBUBA tenzükertem.

²Nenok KIBUBA kidang, asen Tsüngrem kilempok nung noktakertem.

³Nenoki KIBUBA sangang, kechiyong pa tajung lir. Pa tenüngsang ken tenang; kechiyong pa taochi lir.

⁴Kechiyong pai Yakob pei meyong ama, aser Israel pei rongsen ama shimteta lir.

⁵Kechiyong KIBUBA tulu, aser asen KIBUBA tsüngremtem ajak madak temaba lir, ta ni metet.

⁶Kotak nung süshia alima nung süshia, tzü nung aser tarok ajak nung KIBUBAi kechisa mulung, aji pai inyaker.

⁷Alima tatembang nungi pai tzüsü lunga tudaktsür. Tzünglu asoshi pai tsüngpret adokdaktsür; pa terizüngdak nungi pai mopung bener arudaktsür.

⁸Pai Ijip mezüng asoba, nisung aser shiruru anaprong tepset.

⁹Oh Ijip, pai ne dangi, Farao madak aser pa tenzüker ajak madaki, temaitsü aser sayatenya yok.

¹⁰Pai kin aika zükreptsü; aser tashi tulu chubatem tepset;

¹¹Amor chuba Sihon, aser Bashan chuba, Og, aser Kanan chuba yimli ajak,

¹²aser parnok limaji senmang amangtsü asoshi, pei Israel asoshi senmang ka asütsü agütsü.

¹³Oh KIBUBA, ne tenüng teti lir; Oh KIBUBA, putu ajak songtema, na bilemtetba teti alitsü.

¹⁴Kechiyong KIBUBAi pei nübur nem ochiba agütsütsü, aser pei sasa pei tenzükertem indang aochia bilemtsü.

¹⁵ Kintem süngyanglutemji, nisung teka agi yangluba mapa hon aser taribi lir.

¹⁶Parnok tebang lir, saka parnoki mejembir; parnok tenük lir, saka parnoki mangur;

¹⁷Parnok tenarong lir, saka parnoki mangashir; mesüra parnok tebang nung tangula kecha mali.

¹⁸Nisung shia shibai parnok dak temulung lemdir, shirnoki parnok yanglu parnok mesüka akümtsü.

¹⁹Oh Israel kidong, nenoki KIBUBA moajang; Oh Aron kidong, nenoki KIBUBA moajang;

²⁰Oh Levi kidong, nenoki KIBUBA moajang. Nenok KIBUBA tsüburtem, nenoki KIBUBA moajang.

²¹Zion nungi KIBUBA temoatsü süang, shibai Yirusalem nung alir, nenoki KIBUBA sangang.