Read njo TENÜNGSANG KEN 139 Bible Online

TENÜNGSANG KEN 139 - njo bible

TENÜNGSANG KEN 139

¹Oh KIBUBA, nai ni bushi aser ni metet.

²Ni amendang aser ni noktakdang nai metet. Talang nungi kü tebilemba nai angateter.

³Nai kü lenmang aser ni ontaka alidak, aser kü lenmang ajak den metettepa lir.

⁴Kechiyong kü meli nung o kata, Oh KIBUBA, nai memetetba kecha mali.

⁵Na kü tesülen aser tejaklen lir, aser ne teka nai kü dak nemeter.

⁶Iba ama shisatsü ni asoshi onsara tesüngmangtsü. Ibai onsara talang, iba den ni saku masü.

⁷Ne tanela nungi ni koleni aotsü? Mesüra ne tsüngdang nungi ni koleni ajentsü?

⁸Ni anüng temaleni tura, na yangji lir; kü yipten Sheol nung yanglura, ajiang, na yangji lir.

⁹Ni anepdang tashikang tener, aser tzüyim tatembang nung oa lira;

¹⁰oda idakjia ne teka agi ni anitsü, aser ne teka tajichi agi ni amettsü.

¹¹“Atangji ammang agi ni meketbangtsü” ta ni shira, idangji aonungji ni meketa sangwa akümtsü.

¹²Ammangia na nungi atsüka malir, saka aonung anüngdang ama sangwar; ammang aser sangwa ne madang kasa lir.

¹³Kechiyong nai kü telung yanglu; kütsü nu menden nung nai ni yanger.

¹⁴Ni ne nem tenüngsang agütsütsü; kechiyong ni tetsübutsüka aser tesüngmangtsüka yanglua lir. Ne mapatem tesüngmangtsü; aser aji kü nelai shitak junga metet.

¹⁵Kodang ni miima yanglua liasü, aser alima telungtiba nung yangertet, idangji ne dang nungi kü mang miimbanga mali asü.

¹⁶Ne tenük agi kü mabensaba taküm angu. Ni asoshi kümdaktsüba anogotem, ano item kata malidang, ne kaket nung item ajak zülua liasü.

¹⁷Ano kü dang ne tebilembatem koda senti lir, Oh Tsüngrem! Item ajongaji koda tulu lir!

¹⁸Ni itemji züngdangdi asübo, itemji lisem dang nungi timba lir. Kodang ni sakdir, ni ano ne den lir.

¹⁹Atangji nai tamajunger tepsettsü, Oh Tsüngrem. Aji asünung kü dang nungi pila-ang, nenok azüjemnüba nisungtem.

²⁰Kechiyong parnoki na anema mejungi jembir, aser ne tsükchirtemi ne tenüng amajok tetshir.

²¹Oh KIBUBA, na sempartem ni mesempar no? Aser na anema adoker dang ni jashia mali no?

²²Shitakba tesempa agi ni parnok sempar; parnok kü tsükchir ta kü sasa züngshir.

²³Oh Tsüngrem, kü dak bushiang, aser kü mulungjang metetangma. Ni tendangang, aser kü tebilemba metetangma.

²⁴Aser kü dak lenmang tamajung kar danga lira reprangangma; aser teti tatem maka lenmang nung ni aniangma.