Read njo TENÜNGSANG KEN 145 Bible Online

TENÜNGSANG KEN 145 - njo bible

TENÜNGSANG KEN 145

¹Ni na uludaktsütsü, kü Tsüngrem, aser Chuba. Aser ni ne tenüng teti moatsütsü.

²Anogo shia ni na moatsütsü; aser ni ne tenüng teti asangtsü.

³KIBUBAji tulu lir, aser kanga asangtsüla, aser pa ulubaji tatembang maka.

⁴Ne mapatem putu kati putu ka dang asangtsü, aser ne mapa tulu metetdaktsütsü.

⁵Ne sentsüwangshi akhüm tulu ne tetushi indang, aser ne tesüngmangtsü mapatem ni shisadangtsü.

⁶Aser nisungi ne tetsübutsü mapa inyakba tashi indang sayutettsü. Aser na uluba ni metetdaktsütsü.

⁷Parnoki nai kanga ajungba nüngsang ayimoktsütsü, aser ne temeshiba indang pelashishia atentsü.

⁸KIBUBA taochi aser temeim yimlibilem lir. Ain adoktsü meilungi aser temeim yimlibilem tulu lir.

⁹KIBUBAi ajak dang ajunger; aser pa temeim yimlibilem, pa mapa ajak madak lir.

¹⁰Ne mapa ajaki ne nem tenüngsang agütsütsü, Oh KIBUBA, aser ne temeshipuri na moatsütsü.

¹¹Parnoki ne yimli sentsüwangshi indang jembitsü, aser ne ain indang jembitsü.

¹²Ne mapa tulu nisung chirtem dang metetdaktsütsü, aser ne yimli akhüm tulu sentsüwangshi indang metetdaktsütsü.

¹³Ne yimli teti tatem maka chuba yimli lir, aser ne yimsüsüba yimli putu ajak songtema lir. KIBUBAi pa tenangzükba akanga ayur, aser pa mapa ajak nung taochi lir.

¹⁴Shirnok laor, KIBUBAi parnok ajak ajongmesor, aser mechioker alir ajak atsümesor.

¹⁵Tenük ajaki ne madak ata-a alir, aser mapang tetemsü nung nai parnok nem parnok chiyungtsü agütsür.

¹⁶Nai pei teka salar, aser taküm aliba shiai jangraba nai tiptemdaktsür.

¹⁷KIBUBA pei lenmang ajak nung ochi lir, aser pai mapa ajak nung aochir.

¹⁸Shiri KIBUBA ajar parnok ajak dang pa anasa lir. Atangji nung shibai ajar ajak dang anasa lir.

¹⁹Shirnoki pa tsübur parnoki jangraba pai ataloktsütsü; pai ano parnoki ayimtenba angashitsü, aser parnok kümzüktsü.

²⁰Shirnoki pa meimer parnok ajak KIBUBAi wazüka ayur; saka tamajunger ajak samatsütsü.

²¹Kü bangi KIBUBA tenüngsang jembitsü; aser shi ajaki pa temeshi tenüng teti tatem maka moatsütsü.