Read njo TENÜNGSANG KEN 147 Bible Online

TENÜNGSANG KEN 147 - njo bible

TENÜNGSANG KEN 147

¹Nenoki KIBUBA sangang; kechiyong asen Tsüngrem dang tenüngsang ken atentsü junger. Kechiyong pa yimlibilem lir aser tenüngsang ken atentsü tapet lir.

²KIBUBAi Yirusalem mesoa yanglur; pai sentoka aliba Israel anitener.

³Pai temulungjang teraksa anebtsür, aser parnok zübu alentsür.

⁴Pai petinu yongsük sükdanger; pai parnok ajak nem tenüng agütsür.

⁵Asen KIBUBA tulu lir, aser ain nung tashi tulu lir. Pa tangatetba tatembang maka.

⁶KIBUBAi tajemreper ajungketer. Pai tamajunger ali leni aludaktsür.

⁷KIBUBA dang tenüngsang agüja ken tenang. Kongki agi asen Tsüngrem dang ken tenang.

⁸Shibai anüng mepet agi nembangtsür, shibai alima asoshi tzünglu renemtsür, shibai tenem manung ai meidaktsür.

⁹Pai shiruru nem pei chiyungtsü agütsür, aser waro chanutem nem asadang chiyungtsü agütsür.

¹⁰Kor tashi nung pa mulung mepelar; nisung tetsüng nung pa mulung mepelar.

¹¹KIBUBAi pa tsüngken tsüburtem dak, pa temeim yimlibilem nung teimla akartem dak temulung pelar.

¹²KIBUBA sangang, Oh Yirusalem. Ne Tsüngrem sangang, Oh Zion.

¹³Kechiyong pai ne süngkhüm tartangtsü tashi itdaktsü; pai ne chirtem ne dak moatsür.

¹⁴Ne litsü nung pai yimjung yanglur; pai na tsük tesola tajungtiba agi süngdaktsür.

¹⁵Alima madak pai temelaba yoker; pa o kanga kara-a aor.

¹⁶Tezüng ama pai rürjeb agütsür; aut ama pai aon prokshidaktsür.

¹⁷Amtsük telong ama pai rürjeb lung tsükdaktsür. Shibai pa temokong madang noktaktettsü?

¹⁸Pai ozüng agütsür aser parnok yimsadaktsür; Pai pa mopung ondaktsür, aser tzü yimsadaktsür.

¹⁹Pai pei o Yakob dang, Aser pa telatet ozüng aser pa o bendang Israel dang sayur.

²⁰Kin kecha dang pai yamaji meinyak; Aser pa obendangba indang, parnoki itemji memetet. Nenoki KIBUBA sangang!