Read njo TENÜNGSANG KEN 16 Bible Online

TENÜNGSANG KEN 16 - njo bible

TENÜNGSANG KEN 16

¹Ni kümzükang Oh Tsüngrem, kechiaser ni ne dak jenoker.

²Ni KIBUBA dang ashir, “Na kü KIBUBA; ne dak alema tajung kecha melika.”

³KIBUBAr tamang katetba temeshipurtemji koda tamaren! Parnok dak kü tepela ajak lir.

⁴Shiri tangar tsüngremtem sülen anidaker, parnok tejashi tali akümtsü. Ni parnok tetepsetba tenlatem nung matentsü; mesüra kü tebangmechi-i parnok tenüng metetshitsü.

⁵KIBUBA, kü senmang aser kü marok, kü tarutsü tia nai dang kümzüka ayur.

⁶Tasadangba lisüji ni asoshi tajung dak tsükogo; atangji ni jangratemtsü senmang ka kar.

⁷Ni KIBUBA sangdi, shibai ni süneptsür; aonung kü mulungjangi kü dang sayur.

⁸ Ni KIBUBAji kü jakdang maneni ayutsü; kechiaser pa kü teka tajichilen alinung ni marakzütsü.

⁹Aji asünung kü mulung pelar aser kü nela pelaseter, kü temanga teimla nung anisüngzüktsü.

¹⁰ Kechiaser nai kü nela sheol nungi kümzüktsü; ne tadenba nung tabensa tepela lir.

¹¹Nai kü dang taküm lenmang sayur; ne tatenba agi ni peladaktsür, ne teka tajichi nung tatem maka jangratemtsü lir.