Read njo TENÜNGSANG KEN 17 Bible Online

TENÜNGSANG KEN 17 - njo bible

TENÜNGSANG KEN 17

¹Oh KIBUBA, Ochiba asoshi ni mepishiba angang; ni ayimtenba angang. Kü sarasademba angang, kechiaser tiyazü jembiba nungi kü tebangmechi pila-a lir.

²Kü obendangba ne dak nungi adokdakjang; kechi ochi lir ne nüki ngudakjang.

³Nai kü mulung tendanga, aonung nai ni atidangra, nai ni tendangaka, nai kü dak tamajung kecha mangutsü. Kü bangi temenen memenatsü ni mulungtetogo.

⁴Nebang nungi adokba otem ni rizünga ayur; aser tesashir lenmangtem nungi ni kü sasa pilaogo.

⁵Ne lenmangtem nung ni kümdanga jajaogo, anungji kü tsüng majudok.

⁶Ni ne dang ajar, Oh Tsüngrem, kechiaser nai kü dang langzütsü; ne tenarong kü tsütsü shiang aser kü ola angang.

⁷Ne tesüngmangtsü temeim kü dang sayuang; ne dak shiri jenoker parnok anema apusortem nungi nai ne teka tajichi agi parnok kümzüker.

⁸Ne nükdang tenükshitsü ka ama nai ni kümzükang; ne tashikang akhüm nung ni jenokdakjang,

⁹oda ni kangshir tamajunger nungi, aser tesashi tsükchiri ni meketbangba nungi.

¹⁰Parnok mulung nung taochi maka, aser parnoki ngasangatem o jembir.

¹¹Ni kolenisa odir parnoki ni meketbanger; ni ali nung laodaktsütsü asoshi parnoki tenük yoker.

¹²Anüka shisatsütsü yongyaba molusongzü ama parnokji lir, atsüka ataba molusongzü pungtu mesüka lir.

¹³Oh KIBUBA, parnok anema apusoang aser parnok laodakjang; tamajunger nungi ne nok agi ni kümzükang.

¹⁴Oh KIBUBA, iba lima taküm nung pei aginüba ajak akartem nungi ni kümzükang. Nai rizünga akaba timtem agi parnok merenshiang; itemji par chirtem asoshi teperi kümdakjang, aser parnok semchirtem asoshi anünga yujang.

¹⁵Ni asoshibo temeshiba sempetji ne tejak angutsübaji lir; kodang ni sakdir, na nüklai arua ni pelatsü.