Read njo TENÜNGSANG KEN 18 Bible Online

TENÜNGSANG KEN 18 - njo bible

TENÜNGSANG KEN 18

²KIBUBA kü lung, aser kü mitsa, aser kü kümzükba; kü Tsüngrem, kü Lung, shiba dak ni jenoker. Pa kü Jong, ni kümzükba jangzü, kü tashi tait mitsa.

³Ni KIBUBA dang jadi, shiba tenüng asangtsü tetemsü. Anungji kü tsükchirtem nungi ni kümzüka alitsü.

⁴Tasüba lisüi ni naibang; teraksatsüba tzüsemi ni anema ayimer.

⁵Sheol lisü agi ni meketbang; tasüba sang kü dangi aru.

⁶Kü timtem nung ni KIBUBA dang aja; teyari asoshi ni kü Tsüngrem dang ayimten; pai pa tenla ki nungi kü ola angashi; teyari asoshi ni ayimtenba pai angashi.

⁷Idangji alimai atenten aser anokshi, tenem tamentakdaktemi atenten; aser anokshi kechiaser Tsüngremi ain adoka liasü.

⁸Pa teni nungi mokozü adok, pa tebang nungi milak aser jangrua aliba mijang adok.

⁹Pai anüngtemji rakpoka alu, aser pa tetsüng kübok mepet tanak liasü.

¹⁰Pai cherubim ka dak sanger yima ao, pai mopung tashikang nung sanger ao.

¹¹Pa meketbangtsü asoshi pai tammangji yanglu, pa meketa mepet tanak temelem tzü agi sünga liasü.

¹²Pa jakdang nungi prangshiba tsüngpret mi aser rürlung adok, aser mepet tammangji ajanga ao.

¹³KIBUBAi anüngtem nungi tsüngmok aten, tematibai ola adokbaji rürlong aser jangrua aliba mijang liasü.

¹⁴Pai lijakjang yok, aser tsükchirtemji prokshidaktsü. Pai tsüngpret pret aser parnok asemtepa odaktsü.

¹⁵Nai arütsü nung Oh KIBUBA, ne teni nungi tangula saloktsü nung; tzüyim bonglang angu, aser alima tamentakdak mangsa aküm.

¹⁶Pai temalen talang nungi songtok aser kü dak amet, pai tzü tarok nungi ni atsütet.

¹⁷Kü tsükchir tashi tait nungi, aser tashi tulu kü sempartem nungi ni kümzük.

¹⁸Kü lendong anogo nung parnoki ni anema aru, saka KIBUBA kü teyarir liasü.

¹⁹Pai ni tesadem tesem kati anir adok; pai kü dang pela nung pai ni kümzük.

²⁰KIBUBAi kü temeshiba yari kü nem sempet agütsüogo, kü teka merükba yari pai kü nem meyipa agütsüogo.

²¹Kechiaser ni KIBUBA lenmangtem yuogo, ni kü Tsüngrem nungi asüküma meyipa mao.

²²Pa ozüngtem ajak kü jakdang liasü, pa temelabatem nungi ni meyipa mao.

²³Ni pa tsüngdang tai makai liasü, kechiaser ni kü sasa tai nungi pila-a liasü.

²⁴Anungji kü temepishiba yari aser kü teka merükba yari, KIBUBAi kü nem sempet agütsüogo.

²⁵Tamang katetertem dang na tamang katetba ama sayur, tai makartem dang na tai makaba ama sayur.

²⁶Temerükertem dang na temerük ama sayur, saka tekiraker dang na tekirak ama sayur.

²⁷Nai ajemalurtem kümzüker, saka mezümekümer nai anizüktsü.

²⁸Oh KIBUBA, nai kü milen sangwatsütsü, KIBUBA Tsüngremi kü tamang sangwatsü.

²⁹Kechiyong ne teyari ajanga ni temeranger telok ka koktettsü, kü Tsüngrem denbo ni yimti jaratem pungdanga aotsü.

³⁰Tsüngrem mapabo tabensa lir, KIBUBA O shitak. Shiri pa dak jenoker parnok asoshi paji jong lir.

³¹Kechiaser KIBUBA dak alema shiba Tsüngrem lir? Aser asen Tsüngrem dak alaka shiba lung lir?

³²Shibai ni tashi agi nangri kangtsür; aser kü lenmang tabensa kümdaktsür ibaji Tsüngrem lir.

³³ Pai kü tetsüng mesü tetsüng ama kümdaktsür, aser tenem kolak ma nung ni noktakdaktsür.

³⁴Pai ni tongbang asoshi renemtsür, anungji ni yongmenyin lasang azüa arutsü.

³⁵Nai ne tekümzük jong kü nem agütsüogo, ne teka tajichi agi ni sotogo; ne ajemalu agi ni uludaktsüogo.

³⁶Nai kü kübok kü mera sadema kümdaktsüogo, anungji kü tetsüng majudok.

³⁷Ni kü tsükchirtem arishi aser parnok menep; parnok mesamatsü tashi ni memeyip.

³⁸Parnok mesaktettsüsa ni parnok ajensatsü; parnok kü tsüng kübok lao.

³⁹Tongbang asoshi tashi agi nai ni nangri kangtsü; kü anemertem nai kü tsüng kübok yutsüogo.

⁴⁰Nai kü tsükchirtem kü tsütsü tesülen shidaktsü, anungji ni sempartem ni leptoktsüogo.

⁴¹Teyari asoshi parnoki ayimten, saka parnok kümzüktsü shinga maliasü, KIBUBA dang parnoki aja, saka pai parnok dang melangzü.

⁴²Ni parnok menüngsa, anungji parnokji mopungi oner aoba auyi ama liasü; ni parnok dak yimtong nung lishi ama ajemshi.

⁴³Ni anema noktakba nisungtem nungi nai ni kümzükogo, kintem madak nai ni tekolak kümdaktsüogo; nübur shirnok ni memetet, parnok kü küboki aitogo.

⁴⁴Parnoki kü ola angashili kü dang angatsü, bendangertemia kü dang apudaktsü.

⁴⁵Bendangertem temulung makai akümtsü, aser parnok mitsa nungi atentena adoktsü.

⁴⁶KIBUBA taküm lir! Kü lung tenüng sangang! Kü Tsüngrem shibai ni kümzüker pa tenüng sangdongang!

⁴⁷Shibai kü nem takok agütsür aser kintem kü kübok yutsür.

⁴⁸Shibai kü tsükchir nungi ni kümzüker, kü tsükchirtem anema nai ni ajungketer; tesashi nisungtem nungi nai ni kümzüker.

⁴⁹ Anungji kintem rongnung ni na sangdi, Oh KIBUBA, ni ne tenüng nung tenüngsang ken tendi.

⁵⁰Tsüngremi pei chuba nem takok tulu agütsür; pai mezüja shimtetba Dawid aser pa metsü dang tatem makai yimlibilem sayur.