Read njo TENÜNGSANG KEN 19 Bible Online

TENÜNGSANG KEN 19 - njo bible

TENÜNGSANG KEN 19

¹Anüngtemi Tsüngrem sentsüwangshi metetdaktsür, iba yagi pai inyakbatem indang sangdonger.

²Anogo shia iba indang shisatsü sayur, aser aonung shia ibaji lepshir.

³Parnok odong mesüra oshi kecha mali, parnok ola angashitsü makoker.

⁴ Aji saka parnok ola alima ajak ajanga aor, aser aji alima ajaklen nungi angashir. Parnok dak Tsüngremi anü asoshi ki ka yangluogo.

⁵Kiyimsang pei kilung nungi adokba ama, aser tashi tait tasemteper nisung ka; pei tasazük lenmang nung asemtsü pelaseta adokba ama.

⁶Ibai anüng tatem külen nungi adoker, aser tatem külen tashi alonger; iba tatsük nungi kecha miima mali.

⁷KIBUBA ozüngji tetemjen lir, aser tashi tasen agütsür. KIBUBA temelabatemji temulung alemtsüba lir, tongmelangertem shisa kadaktsür.

⁸KIBUBAr ozüngtemji tabensa lir, temulung peladaktsür; tenük asoshi tesangwa; KIBUBA temelabaji temerük lir, aser temulung nung tangatetba agütsür.

⁹KIBUBA tsübubaji temerük lir, ibai teti tatem makai alitsü. KIBUBA obendangbaji ochi aser temeshi lir.

¹⁰Itemji hon temeja dang nungia sentiba, aser ninang mojitzü temeja dang nungia tanangba lir.

¹¹Item yagi ne tenzüker kümdangdaktsür, itemji benshi nung sempet tulu lir.

¹²Shibai pa tai ajitettsü akok? Miima aliba tai nungi ni meshitetjang.

¹³Metet-sümonga aibelenba taitem nungi ne tenzüker kümzüka yuang; item jagi ni tanishidaktsü. Idangji ni tai meketi alitsü aser ozüng raksaba tulu nungi, merükteta alitsü.

¹⁴Kü bang nungi adokba otem, aser kü mulung nung bilemdangbatemji, ne madang tagizüktettsü kümdakjang, Oh KIBUBA, kü lung aser kü alangzüksang.