Read njo TENÜNGSANG KEN 22 Bible Online

TENÜNGSANG KEN 22 - njo bible

TENÜNGSANG KEN 22

¹ Kü Tsüngrem, kü Tsüngrem, kechiba nai ni toktsür? Ni kümzüktsü aser kü tanüngba ola nungi kechiba na papigati pilar?

²Oh kü Tsüngrem, ni anüngdang ayimtener, saka nai melangzür, aonung ni ajar, saka anisüngzük mangur.

³Saka na temeshisang lir, shiba Israel tenüngsangma nung mena lir.

⁴Ozü tsüraburtemi ne dak amang; parnoki amang aser nai parnok kümzük.

⁵Parnoki ne dang ayimten aser parnok kümzük; parnoki ne dak amang aser parnok mak mesüdaktsü.

⁶Saka nibo joko nisung ka ama masü, nisung ajaki atalaba aser mesenmetuba mesen ka lir.

⁷ Ni angur ajaki ni atala-a menütsür, parnoki tebang mejuloktsür aser tekolak angümlokja ashir,

⁸ “Pai KIBUBA dang amang; KIBUBAi pa kümzükdakjang. KIBUBAi pa dak temulung achir süra, pai pa kümzükdakjang.”

⁹Saka ni nu menden nungi agitetbaji na lir, oda kütsü teku nung alidang nungi ne dak amangtsü sayu.

¹⁰Tasodang nungi kü teimla na liasü; aser tang tashi na kü Tsüngrem lir.

¹¹Ni nungi talangka pila-a teli, kechiaser timtem ana nung lir, aser teyarir shinga mali.

¹²Nashi pungchi aikati ni meketbangogo; tashi tait Bashan nashi pungchi-i ni lungbangogo.

¹³Arüa aliba molusongzüi pei chiyungtsü shisaba ama, kü dang parnoki tebang kaloktsür.

¹⁴Ali nung tzü shitokba ama, kü tashi kümogo. Kü teret ajak lokshiogo; kü mulungjang nirep ama lir; Telunglen ya yimsa-a aor.

¹⁵Kü tashi porep ama kümogo; aser kü temeli kü tebang tawa nung menaloker; nai ni tasüba auyi dangi ania aruogo.

¹⁶Tamajunger telok kati ni lungbangogo; azü lokti-i ama parnoki ni meketbangogo, parnoki kü teka aser tetsüng nung tsüngogo.

¹⁷Ni kü teret ajak züngdangteter; nisungtemi kü dak rangshia ajir.

¹⁸ Parnoki kü sobutsü parnok rongnung lemsar, aser kü sepoksü atema parnoki an toktanger.

¹⁹Saka na Oh KIBUBA, ni nungi pela-a teli; Oh kü tashi, yakta arua ni yariang.

²⁰Kü nela nok nungi kümzükang; item azütem tashi nungi kü taküm kümzükang.

²¹Molusongzü bang nungi ni kümzükang; arem nashi pungchi tezü nungi nai kümzükang.

²² Ni kü adianutem dang ne nüng metetdaktsüdi; telok nung ni na sangdi.

²³Nenok KIBUBA tsüburtemi pa sangang! Nenok Yakob metsütemi pa sentsüwangshidakjang! Israel nübur ajaki pa külemang.

²⁴Kechiaser sensakertem pai mesentok, mesüra parnok timtem pai mereprangi mali; pai pa tejak parnok dang nungi memiim, saka teyari asoshi parnoki ayimtenba pai angashi.

²⁵Telok tulu nung ni ne nem tenüngsang agütsütsü, shiri na tsübur parnok tsüngdang ni kü tenangzükba agütsütsü.

²⁶Sensakertemi achitsü aser tipatemtsü; shirnoki pa bushir, parnoki KIBUBA asangtsü. Nenok mulungjang teti asoshi lidakjang!

²⁷Kin ajaki KIBUBAji bilemtettsü, aser alima ajaklen nungi parnoki pa dangi meyiptsü; kin kidong ajaki pa dang külemtsü.

²⁸Kechiaser yimliji KIBUBA meyong lir, aser kintem madak pai yimsü asür.

²⁹Alima nung jangratema alir ajaki pa madang apudaktsü, auyi dangi alur ajaki pa tsüngdang apudaktsü; aser kü nelai pa asoshi alitsü.

³⁰Tarutsü pututemi pa tenzüktsü, tarutsü putu dang nisungtemi KIBUBA indang jembitsü.

³¹Ano mesoi aliba nüburtem dang, pa temeshiba indang aser pa tekümzükba indang sangoktsütsü.