Read njo TENÜNGSANG KEN 25 Bible Online

TENÜNGSANG KEN 25 - njo bible

TENÜNGSANG KEN 25

¹Oh KIBUBA, ni ne dangi kü nela aka asor;

²Oh kü Tsüngrem, ni ne dak amanger, ni mak tesüdaktsü, mesüra kü tsükchiri kü madak takok tengudaktsü.

³Shirnoki ne dak imlar parnok mak tesüdaktsü, saka shirnoki na anema apusor parnok maak südakjang.

⁴Oh KIBUBA, ne lenmangtem kü dang sayuang, itemji kü nem metetdakjang.

⁵Ne ochiba lenmangi ni aniang aser kü dang sayuang, kechiaser na kü tekümtet Tsüngrem lir; aser anogo tepiyong ni na asoshi atar.

⁶Oh KIBUBA, ne taochi aser temeim bilemtetang, koba nai akhidang nungi sayuogo.

⁷Oh KIBUBA, na ajungba aser temeim yari kü lanuwa temenen aser tai tebilemtetma; saka ne taochi yari ni bilemtetangma.

⁸KIBUBAji tajung aser tindang lir; anungji pai temenen purtem dang lenmang sayur.

⁹Ajemalurtem pai ochiba lenmangi anir, aser sensakertem dang pai lenmang sayur.

¹⁰Shiri KIBUBA tezüngzüktepba aser ozüngtem benshir, parnok asoshi pa lenmangtem temeim aser ochi lir.

¹¹Oh KIBUBA, ne tenüng atema, kü temenen tulu liaka itemji tokangma.

¹²Nisung shia shibai KIBUBA tsübur, pai koba lenmang shimtsü pai pa dang sayutsü.

¹³Pa takümji azükaru nung alitsü, aser pa metsüi alima senmangji amangtsü.

¹⁴Shiri KIBUBA tsübur parnokji pa tembar lir, aser pai parnok dang pa tezüngzüktepba metetdaktsütsü.

¹⁵Kü tenük teti KIBUBA dak lir, kechiaser pai dang kü tsüng sang nungi agitettsü.

¹⁶Kü dangi meyipang aser kü dang aochiang, kechiaser ni azüngmeyaka aser kangshia lir.

¹⁷Kü mulung timtem züina lir, kü timtem nungi ni anitetang.

¹⁸Kü timtem aser tekangshi indang bilemdangang, aser kü temenen ajak tokangma.

¹⁹Kü tsükchirtem koda renloker reprangang, aser parnoki koda sashia ni sempar.

²⁰Kü taküm sotang aser ni kümzükang; ni mak tesüdaktsü, kechiaser ni ne dak jenoker.

²¹Temeshiba aser ochibai ni kümzükangma, kechiaser kü teimla ne dak lir.

²²Israel kümzükang, Oh Tsüngrem, parnok timtem ajak nungi.