Read njo TENÜNGSANG KEN 27 Bible Online

TENÜNGSANG KEN 27 - njo bible

TENÜNGSANG KEN 27

¹KIBUBAji kü tesangwa aser kü tekümtet lir; ni shiba tsübutsü? KIBUBAji kü taküm jenokdak ni shiba dang tsübutsü?

²Kodang temenen nisungtemi kü shi achitsü ni anema arudir, kodang kü arür aser tsükchirtemi ni anema apusodir, parnok metsüdaktsü aser alangtsü.

³Temeranger telok kati ni meketbangaka, kü mulungi metsübutsü; ni anema rara adokaka, ni Tsüngrem dak tamang ayutsü.

⁴Ni KIBUBA dang langka asüngdangogo, ni ibaji bushitsü, oda kü arishi anogo tepiyong, KIBUBA kidang lia KIBUBA tobur ajungba reprangtsü, aser tenla kidang pa dang asüngdangtsü.

⁵Kechiaser timtem anogo nung pai ni kümzüktsü; pa tekümlemdak pai ni kümzüka ayutsü aser lungma nung ajungkettsü.

⁶Idangji ni meketa aliba tsükchirtem madak ni takok angutsü, pa tekümlemdak ni tepela ola den tenla agütsütsü, ni ken atentsü, ni KIBUBA nüngsang ken atentsü.

⁷Oh KIBUBA, kodang ni jadir kü dang angang, kü dang aochiang aser langzüang.

⁸“Kü tejak bushiang” ta nai ashidang, kü mulungi ne dang ashi, “Oh KIBUBA ni ne tejak bushidi”

⁹Kü dang nungi ne tejak temiim, ain adoka ne tenzüker teindok; na kü teyarir süa aruogo, ni teindok mesüra tesendok, Oh kü tekümtet Tsüngrem.

¹⁰Kütsü aser kübui ni senzüka yujaka, saka KIBUBAi ni asoshi anebalutsü.

¹¹Kü tsükchirtem alibayong, Oh KIBUBA ne lenmang kü dang sayuang, aser ni ochiba lenmangi aniangma.

¹²Kü tsükchir mulungba nem kü taküm tagütsü, kechiaser tiyazü kulitemi ni anema amok merener.

¹³Ni ya amanger, ni akümlir lima nung KIBUBA ajungba angutsü.

¹⁴KIBUBA dak amangang, tashi itang, aser ne mulung tasü itang; aser KIBUBA dak ne teimla yuang.