Read njo TENÜNGSANG KEN 28 Bible Online

TENÜNGSANG KEN 28 - njo bible

TENÜNGSANG KEN 28

¹Oh KIBUBA, ni ne dang ajar; kü lung, kü dang mangai telima. Nai kü dang ola madoki lira, kanglai aiba nisungtem ama nia akümtsü.

²Kodang teyari asoshi ni ayimtendir, aser ne temeshitiba tsütsü kü teka mekangdir, kü ola angangma.

³Tamajung aser temenen inyakertem, shirnoki pei kiyongertem den yimjung jembir, saka parnok mulung nung tamajung lir, parnok den ni anir tuoma.

⁴ Parnok mapatem aser parnok temenen mapatem yari parnok nem meyipa agüjang. Parnok teka mapa tamajung yari aser parnok dak alangba yari parnok nem agüjang.

⁵KIBUBAi inyakba aser pai yangluba teka mapatem nung, parnoki temulung magütsü; anungji pai parnok raksatsütsü aser parnok joko meyanglushitsü.

⁶KIBUBA nem tenüngsang agüjang, kechiaser ni teyari asoshi ayimtenba pai angashiogo.

⁷KIBUBA kü tashi aser kü jong, ni pa dak amanger aser teyari angur. Kü mulungjang tepela agi sünga lir, aser ni pa dang tenüngsang ken atentsü.

⁸KIBUBAji par nübur tashi lir. Pai mezüja shimtetba pur asoshi tekümtet mitsa.

⁹Ne nüburtem kümzükang aser ne senmang moajang; parnok sannüker na süang aser teti asoshi parnok anebaluang.