Read njo TENÜNGSANG KEN 31 Bible Online

TENÜNGSANG KEN 31 - njo bible

TENÜNGSANG KEN 31

¹Oh KIBUBA, ni ne dak jenoker; ni kodanga mak tesüdaktsü; ne temeshiba nung ni kümzükang.

²Ne tenarong kü tsütsü shiang, ni kümzüktsü yakta arung; ni kümzüktsü asoshi kü jenokdak lung, aser tashi tait mitsa süang.

³Kechiaser na kü lung aser kü mitsa, ne tenüng atema kü dang sayuang aser ni aniang.

⁴Ni asoshi yangluba sang nungi ni kümzükang, kechiaser na kü mitsa.

⁵ Neka nung ni kü nela yutsür, ni kümzükang, Oh KIBUBA tamang katetba Tsüngrem.

⁶Amajok süngyanglu külemertem ni sempar; saka ni KIBUBA dak amanger.

⁷Ni ne marakzüba temeim nung pelatsü, kechiaser nai kü timtem nguogo aser kü tanela tepetzük tia nai nguogo.

⁸Nai ni kü tsükchir ket nung mamoktsü; nai kü tetsüng tesademdak ajemetdaktsü.

⁹Kü dang aochiang, Oh KIBUBA, kechiaser ni timtem nung lir; kü tenük, kü tanela, aser kü temang tejashi agi tashi mait akümer.

¹⁰Kü taküm tejashi den aser kü arishi tanüngba nung süidaktsür, kü timtem kü tashi agi metizüker, aser kü terettem jena akümer.

¹¹Kü tsükchir ajaki ni züngdokogo, kü kiyonger tsüngdang ni tesempatsü ka, aser kü tembartem asoshi ni tetsübutsüka kümogo; yimtong nung shirnoki ni angur parnoki ni nungi ajener.

¹²Nibo asür ka ama parnok temulung nungi amadoka lir, nibo po teraksa ka ama dang lir.

¹³Kechiaser aikati nemnemba ni angashir, ajaklen tetsübutsü dang lir. Parnoki ni anema tasa asar, aser kü taküm agitsü atonger.

¹⁴Saka ni ne dak amanger, Oh KIBUBA, ni ashir, “Na kü Tsüngrem lir.”

¹⁵Kü mapangtem neka nung lir, kü tsükchirtem nungi aser ni rishikangshirtem nungi ni kümzükang.

¹⁶Ne tenzüker dak ne tejak yalokjang, ne marakzüba temeim nung ni kümzükang.

¹⁷Ni mak tesüdaktsü, Oh KIBUBA, kechiaser ni ne dang jaogo. Tamajungerji maak südakjang; parnokji asüyimi ola madoki odakjang.

¹⁸Parnok tebangmechi, kobai temeshipur anema asüküm aser tatala o jembir, ola tatokdaktsü.

¹⁹Na ajungba koda tesüngmangtsü, koba nai na tsüburtem asoshi rizüng! Koba nai meimchir madang, oda ne dak jenokertem asoshi nai inyak.

²⁰Nai parnok nisung tasa nungi ne talidak miimtsü, nisung temeli rara nungi nai parnok ne talidak kümzüka ayu.

²¹KIBUBA nem tenüngsang agüjang, kechiaser makbanga aliba yimti nung alidang, pai pa tesüngmangtsü temeim kü dang sayu.

²²Pa jakdang nungi ni aridokogo ta ni tsübuseta bilem, saka kodang ni teyari asoshi ayimten pai kü ola angashi.

²³Nenok pa temeshipur ajaki KIBUBAji meimtsüla, KIBUBAi temeshipur kümzüka ayur, saka asükümer nembo temerenshi moshia meyipa agütsür.

²⁴KIBUBA dak imlar ajak, tashi itang aser tasü itang.