Read njo TENÜNGSANG KEN 32 Bible Online

TENÜNGSANG KEN 32 - njo bible

TENÜNGSANG KEN 32

¹ Shiba ozüng raksaba asoshi tatok nguogo, shiba temenen nembangogo pa tepelatsü.

²Shiba nem KIBUBAi tai magütsür, shiba tanela nung tekülak mali pa tepelatsü.

³Kodang ni kü temenentem menangzüki ali, anogo tepiyong anüngba agi ni lurepdaktsü.

⁴Kechiaser mangli sangwali aben nai ni merenshi, meiwa tatsük agi mopung kongdaktsüba ama kü tashi makai kümogo (Selah)

⁵Idangji ni kü temenen ne nem metetdaktsü, aser ni kü tai miima mayu. Ni ashi, “Ni kü ozüng raksabatem KIBUBA dang nangzüktsü” aser kü ozüng raksaba tai nai atok. (Selah)

⁶Anungji Tsüngrem tsübur nisung ajaki timtem mapang ne dang sarasademdakjang, kodang tzümetsüng ama timtem tulu arudir, iba jagi parnok dak matongtsü.

⁷Na kü tatsükokdak, timtem nungi nai ni kümzüka ayur, tekümzükba kentem agi nai ni meketbanger (Selah)

⁸KIBUBAi ashir, “Koba lenmangi na aotsü aji ni ne dang sayutsü, ni na anüktsü aser sayu o ashitsü.

⁹Tangatettsü shisatsü maliba kor mesüra gado ama teli, koba azüoktsü asoshi tanishiba lisü aser temangemba merang dak parnok azüoktsü tashi lir.”

¹⁰Tamajunger asoshi tejashi aika lir, saka shibai KIBUBA dak amanger, yimlibilem agi pa meketbanger.

¹¹Nenok temeshipurtem, KIBUBA dak temulung chiang aser pela-ang; nenok temulung tindang purtemi tepela agi ayimtenang.