Read njo TENÜNGSANG KEN 33 Bible Online

TENÜNGSANG KEN 33 - njo bible

TENÜNGSANG KEN 33

¹Oh temeshipur, nenoki KIBUBA dang pela-ang; tindangeri pa asangtsü tapet lir.

²Kongki agi KIBUBA nem tenüngsang agüjang, lisü ter aketba tzürang kongki agi pa nem tenüngsang agüjang.

³Pa nem ken tasen ka tenlokjang; tepela ola tulu den kongki temang,

⁴Kechiaser KIBUBA o shitak aser ochi lir; aser pa mapa ajak tamang kateta inyaker.

⁵Pai temeshiba aser ochi obendang meimer; KIBUBA yimlibilem agi alimaji sünga lir.

⁶KIBUBA o agi anüngtemji yanglu; aser idakji aliba ajak pa tangula agi yanglu.

⁷Pai tzüyim tzüji bongdang ka nung ama bendener; aser azü taroktemji jendang bendener ama.

⁸Alima ajaki KIBUBAji tsübuang; alima nung alir ajaki pa tsübudakjang.

⁹Kechiaser kodang pai jembi aji adok, pai ozüng agütsü aser kechisarena adok.

¹⁰Kintem sentongji KIBUBAi benjatsür, nisungtem tasaji pai amajok kümdaktsür,

¹¹Saka KIBUBA sentongbo tatem makai alir, pa mulung nung bilembaji putusa putu majener.

¹²Kin koba Tsüngremji KIBUBA lir, tepelatsü; shir kin pa meyong asütsü shimtetogo.

¹³KIBUBAi kotak nungi repranger; aser meimchir ajak angur.

¹⁴Pa amenba chuba menden nungi, alima nung alir ajak pai repranger.

¹⁵Pa shibai parnok mulungjang yanglu, paisa parnok mapa meteter.

¹⁶Chuba shinga pei temeranger telok agi mekümzüker, mesüra nokinketer ka pei tashi agi mekümzüker.

¹⁷Takok asoshi raraba kortem dak metalokbaji amajok, kechiaser parnok tashi tulu jagi mekümzüktet.

¹⁸Saka shirnoki pa temeim yimlibilem nung imlar, parnok madak KIBUBA tenük lir.

¹⁹Tasüba nungi parnok kümzüktsü, aser ayawara nunga parnok taküm lidaktsütsü.

²⁰Onok tanelai KIBUBA asoshi atar, pa onok teyarir aser jong.

²¹Onok temulungjangi pa dak pelar, kechiaser onoki pa temeshi tenüng nung amanger.

²²Oh KIBUBA, onoki ne dak imlaba yari, ne temeim yimlibilem onok dak lidakjang.