Read njo TENÜNGSANG KEN 34 Bible Online

TENÜNGSANG KEN 34 - njo bible

TENÜNGSANG KEN 34

¹Ni teti KIBUBA nem tenüngsang agütsütsü; pa nüngsangba maneni kü bang nung alitsü.

²Kü nelai KIBUBA nung sentsüwangshir, ajemalurtemi aji angashiang aser pela-ang.

³Kü den külemi KIBUBA uluba sangokjang; asenok külemi pa tenüng tushidi.

⁴Ni KIBUBA bushi aser pai kü dang langzü; aser kü tetsübu ajak nungi ni kümzük.

⁵Shirnoki pa dak rangloker, parnok tejak tesangwa alitsü, aser kodanga akseta malitsü.

⁶Iba sensakeri ayimtenba ola KIBUBAi angashir, aser pai timtem ajak nungi pa kümzüker.

⁷Shiri KIBUBA tsübur parnok meketa pa tenyartem alir; aser parnok kümzüker.

⁸ Oh, KIBUBAji junger ta menakdangang aser metetang, shibai pa dak jenoker pa tepelatsü.

⁹KIBUBAji tsübuang, nenok pa temeshipurtem; kechiaser shiri pa tsübur, parnok kecha agia manüngtsü.

¹⁰Molusongzü chanu anünger aser aya agi kangshir; saka shiri KIBUBA bushir, parnok tajung kecha agia manüngtsü.

¹¹Tanurtem arung, kü dang angang; ni nenok dang KIBUBA tsübuba sayudi.

¹² Nenok shibaisa taküm tajung linür. Shibai arishi talang aser jangratema linür?

¹³Ne temeli tamajung nungi sotang, aser tekülak jembiba nungi nebangmechi sotang.

¹⁴Tamajung nungi pila-ang aser tajung inyakang; yimjung bushiang aser aji arishiang.

¹⁵KIBUBA tenük temeshipur madak lir, parnoki ayimtenba tsütsü pa tenarong shia lir.

¹⁶Saka KIBUBA tejak, tamajung inyaker anema lir, parnok mebilemtettsüsa alima nungi meshimeshia atsüdoktsü.

¹⁷Temeshipurtemi ayimtenba KIBUBAi angashir; pai parnok timtem ajak nungi kümzüker.

¹⁸Temulung teraksa nung alir tsütsü KIBUBA lir, aser teimla samar alirtem pai kümzüker.

¹⁹Temeshi nisung ka timtem aika lir, saka item ajak nungi KIBUBAi pa kümzüker.

²⁰ Pai pa teret ajak anüker, parnok ka danga meraksatsü.

²¹Temenen agi tamajungerji tepsettsü, aser shiri temeshipur sempar parnok aitsütsü.

²²KIBUBAi pa tenzükertem taküm alangzüker, aser shirisa pa dak jenoker parnok shinga mesamatsü.