Read njo TENÜNGSANG KEN 35 Bible Online

TENÜNGSANG KEN 35 - njo bible

TENÜNGSANG KEN 35

¹Oh KIBUBA, shiri kü den tokteper, parnok den toktepang; shiri kü den rarar parnok den rara-ang.

²Tekümzükba jong aser tezükdokba jong am-ang, aser kü teyari asoshi aramesoang.

³Shiri ni arishir parnok anema nü atsütetang, kü taküm dang shiang, “Ni ne tekümtet.”

⁴Shiri kü taküm bushir, parnok mak südakjang, shiri ni timtemdaktsütsü bushir, parnok maaksü nung meyipdakjang.

⁵Parnok KIBUBA tenyar madang, mopungi ona aoba tsüksü ama lidakjang.

⁶KIBUBA tenyari parnok arishidang, parnok lenmang tammang aser tanüla lidakjang.

⁷Kechiaser kecha masü nung parnoki ni asoshi miima sang ayu, aser kecha masünung parnoki ni asoshi kangla ka atu.

⁸Memeteti pa dangi tesama arudakjang, aser pai miima yangluba sang nung pa shidakjang. Kangla nungji pa tsükdakjang.

⁹Idangji ni KIBUBA dang pelatsü, aser pa tekümtet nung jangra atemtsü.

¹⁰Kü teret ajaki ashitsü, “KIBUBA na mesüka shiba lir? Nai tashi maiter tashi taiter nungi kümzüker, sensaker parnok rishikangshir nungi nai kümzüker.”

¹¹Tiyazü kulitem ni anema agütsür, ni kechi memetet, iba indang parnoki kü dang asüngdanger.

¹²Parnoki kü nem tajung melen tamajung agütsür, aser kü nela lurepdaktsür.

¹³Saka kodang parnok shirangdir, ni anem sü abener ajemalua lumir. Ni kü kolak mechioker sarasademer,

¹⁴Tembar ka mesüra adianu ka ama; aser pei tetsü asoshi mang ayimba ama, timtem aser tejashi nung ni apudak.

¹⁵Saka kodang ni metsüdakdir, parnoki külemi senteper ni menütsür, ni memetetba kü anemertemi ni anema senteper. Parnoki tanen makai kü dak azüker.

¹⁶Tsüngrem memetetba pur benjongdak ama, parnoki kü dak parnok tepu shitepa sayu.

¹⁷Oh KIBUBA nai kopiga repranga atatsü? Parnoki raksatsüba nungi ni kümzükang, item molusongzütem nungi kü taküm kümzükang.

¹⁸Idangji mungdang tulu nung ni na asangtsü, nisung aika sendena alidak ni na sangdi.

¹⁹ Kü tsükchirtem, shir tiyazürtem lir, parnok kü madak tepeladaktsü, kecha masü nung shiri ni sempar, parnok tenük kü dak teremlokdaktsü.

²⁰Kechiaser parnoki yimjung indang mejembir, saka shir linük nung ajem ajema alir, parnok anema tekülak o jembir.

²¹Parnoki kü dak tebang remlokja ashir, “Ah-ha! Onok tenük agi aji nguogo.”

²²Oh KIBUBA nai aji nguogo, mokorai teli; Oh KIBUBA, ni nungi pila-a teli.

²³Arakzüang, Oh KIBUBA, aser ni kümzükang. Kü Tsüngrem aser kü KIBUBA, ni asoshi aramesoang.

²⁴Oh KIBUBA, ne temeshiba yari kü o bendangang, aser parnok kü madak tepeladaktsü.

²⁵“Aha,Onoki imlaba ama atalokogo” ta, parnoki pei temulung nung teshidaktsü, mesüra onoki pa meyokogo ta teshidaktsü.

²⁶Kü tejashi madak pelateper ajak külemi mak südakjang. Shiri ni anema tetushi angu parnok maksü aser tejak ashiba agi sobudakjang.

²⁷Kü ochi mapa nung shiri pelar parnoki tepela agi maneni ayimtendakjang. Shiri pa tenzüker yimjung nung aliba ngua pelar parnoki “KIBUBAji tulu lir” ta maneni shidakjang.

²⁸Idangji anogo tepiyong ne temeshiba, aser ne nüngsang indang kü temeli agi jembitsü.