Read njo TENÜNGSANG KEN 37 Bible Online

TENÜNGSANG KEN 37 - njo bible

TENÜNGSANG KEN 37

¹Tamajunger asoshi shisa tebulu, mesüra shiri tai inyaker parnok tenükshi.

²Kechiaser kopi meli-i ai ama akongtsü, aser süngo-lio lanu ama parnokji akongtsü.

³KIBUBA dak amangang, aser tajung inyakang; aji süra na ali nung taso shia alitsü.

⁴KIBUBA dak pela-ang, aser pai ne mulungi aginüba agütsütsü.

⁵Ne lenmang KIBUBA nem bendanga agüjang, ano pa dak amangang, aser pai aji inyaktsü.

⁶Pai ne temeshiba tesangwa ama kümdaktsütsü, aser ne temedenba anüngdang anü ama kümdaktsütsü.

⁷KIBUBA madang ajemajema liang, aser pa dang arema ata-ang. Kodang nisung kar azükarua ngudir, aser parnok temenen mapa inyakba nung takok ngudir, parnok atema tenemnem.

⁸Rasaba nungi anenang aser terasaba tokjang, tenemnem, iba jagi tamajung inyakleni dang anir.

⁹Kechiaser tamajung inyakertem leptoktsü, saka shiri KIBUBA dak imladir, parnoki alima senmangji amangtsü.

¹⁰Kenpiga dang lirbo tamajungji malitsü, nai pa talidak junga bushiaka nai pa mangutsü.

¹¹ Saka ajemaluri alima senmangji amangtsü, aser yimjung nung azükarutsü.

¹²Tamajungeri ochishir anema tasa asar, aser pa dak tepu shiloktsür.

¹³Saka pa taküm tatem anasa lir ta meteta, KIBUBAi pa dak menüloktsür.

¹⁴Sensaker aser timtemer anema tamajungeri nok atsütetaka aser lasang azüa aruaka; aser ochishirtem tepsettsü merangaka,

¹⁵Parnok nok parnok temulungjangi ateta aitsü, aser par lasangji ang raksatsü.

¹⁶Temeshipur rongsen ishika akabaji, tamajungpur rongsen jenti akaba dang taoba;

¹⁷Kechiaser tamajunger nok o nüji raksatsü, saka KIBUBAi temeshipurji kümzüker.

¹⁸Tai makar anogotem KIBUBAi metet, Parnok senmang tatem makai alitsü.

¹⁹Tamajung mapang nung parnok tim matemtsü, ayawara anogotem nunga parnok peria alitsü.

²⁰Saka tamajungerbo samatsü, KIBUBA anemertemji arem süngo ama samatsü, mokozü dang nungia tekaraba parnok samatsü.

²¹Tamajungeri apur, saka kodanga meyipa magütsür, saka temeshi nisungi mulungsoa agütsür.

²²Shirnok KIBUBAi moatsür parnoki alima senmangji amangtsü, saka shir pai atakatemer, parnokbo leptoktsü.

²³Nisung ka lenmang nung KIBUBAi pelara, pai pa meratemji tashi itdaktsür.

²⁴Pa metsüdakaka, pa malangtsü, kechiaser KIBUBAi pei ket agi pa soter.

²⁵Tangbo ni tambur kümogo, saka kü lanuwa nungi temeshipur senzüka yutsüba ni mangu, mesüra pei chirtem meshimetsüba ni munguka.

²⁶Pai teti aochir aser mulungsoa aputsür, par chirtemji teti temoatsü ka-a alitsü.

²⁷Tamajung nungi pila-ang aser tajung inyakang, süra na tatem makai alitsü.

²⁸Kechiaser KIBUBAi ochishir meimer, aser pai tamang katetbatem mesendoktsü. Parnokji tatem makai kümzüka alitsü, saka tamajunger metsüjibo leptoktsü.

²⁹Temeshipuri alima senmangji amangtsü, aser yangji tatem makai alitsü.

³⁰Temeshipur tebangi shisa taka o jembir, aser pa temeli agi ochi jembir.

³¹Pa Tsüngrem ozüng pa mulung nung lir, pa tetsüng kodanga majudoktsü.

³²Kodang tamajungeri temeshipur miter, aser pa tepsettsü bushir;

³³KIBUBAi pa ket nung pa magütsütsü, mesüra obendangdak pa maitsütsü.

³⁴KIBUBA asoshi ata-ang aser pa lenmang nung liang, aser alima senmangji amangtsü asoshi pai na uludaktsütsü; kodang tamajungpurji leptokdir, nai aji angutsü.

³⁵Tamajunger nisung ka ni angu; pa Lebanon nung cedar süngdong ama mesangshia aoba ni nguogo.

³⁶Saka kodang ni ajagi ao, pa yangji maliasü; ni pa bushiaka paji mungutet.

³⁷Nisung tajung aser tindang nisung ajioka yuang; kechiaser yimjung nisung asoshi tarutsü teimla kar.

³⁸Saka temenenpur ajak samatsütsü, tamajunger tarutsüji leptoktsü.

³⁹Temeshipur tekümtetji KIBUBA nungi aru; timtem mapang nung pa parnok mitsa lir.

⁴⁰KIBUBAi parnok yarir aser kümzüker, pai parnok tamajungpur nungi kümzüktsü; kechiaser parnoki pa dak jenok.