Read njo TENÜNGSANG KEN 38 Bible Online

TENÜNGSANG KEN 38 - njo bible

TENÜNGSANG KEN 38

¹Oh KIBUBA, nai ni ain adoka tarütsü, mesüra nai mit adoka ni temerenshi.

²Kechiaser ne lijakjang agi ni ateta atsünger, aser ne teka agi kü dak azüker.

³Ne ain adokba yong kü shi nung kecha tesünep mali; mesüra kü menen aliba yong kü teret nung anisüngzük maka.

⁴Kechiaser kü tai kü kolaki tuogo; Khu taret ama, parnok ni asoshi onsara taret.

⁵Kü tamashiba yong kü zübu, tesembatsüka aser tamajungba kümogo.

⁶Ni kanga kangshir aser angümzüka alur; anogo tepiyong ni mang ayimer.

⁷Kü teperem twangwangba agi sünga lir, aser kü shi nung anisüngzük maka.

⁸Ni lula-a lir, aser kanga raksa-a lir, kü mulung mesüngjemtetba yong ni anünger.

⁹Oh KIBUBA, kü taginüba ajak ne tsüngdang lir; kü tanüngba ne madang miima mali.

¹⁰Kü mulungjang toktoker, ni tashi mait akümer; oda kü tenük tesangwa kü dak nungi pilaa ogo.

¹¹Kü temeimbatem aser kü medemertemi kü tekangshi nungi talangka pila-a noktaker; oda kü adianutemia talangka nungi ni ajir.

¹²Shiri kü taküm bushir parnoki sang asor, ni raksatsütsü bushirtemi o tamajung jembir; aser anogo tepiyong tekülak shisadanger.

¹³Saka tenarong tajaker ama ni mangashir, temeli tatsük shibai pei tebang melapoker yamaji ni lir.

¹⁴Angashitsü makokba nisungi, yakta telangzütsü magütsüba ama ni lir.

¹⁵Saka Oh KIBUBA, ni ne dak imlar, aser nai langzütsü, Oh KIBUBA kü Tsüngrem.

¹⁶Kodang kü tetsüng ajudoker, parnoki kü madak tepeladaktsü mesüra ni anema parnok tasükümdaktsü.

¹⁷Kechiaser ni talanger dang lir, aser kü tejashi teti kü jakdang lir.

¹⁸Hau, ni kü tai nangzüker, kü temenen asoshi ni jashiseter.

¹⁹Kechiaser kü tsükchirtem tashi tait aser aika lir, aser kuli kecha makai parnoki ni sempar.

²⁰Shirnoki tajung melen tamajung shia agütsür, parnokji ni anema lir, kechiaser kechi tajung lir aji ni inyaker.

²¹Oh KIBUBA, nai ni tesendok, Oh kü Tsüngrem ni nungi pila-a tuo.

²²Ni yaritsü asoshi yakta arung, Oh KIBUBA, kü kümzüksang.