Read njo TENÜNGSANG KEN 39 Bible Online

TENÜNGSANG KEN 39 - njo bible

TENÜNGSANG KEN 39

¹Ni ashi, “Kü temeli agi temenen memenatsü asoshi, ni aolen kümdangdi. Tamajunger kü madang ali tashi ni kü tebang nung lakem yudi.”

²Saka kodang ni ola madoki ajem ajema oda kecha tajung mejembi-i liasü; kü tejashi dang tali züin.

³Kü mulung telung nung tarongba liasü, kodang ni iba indang shisadanga liasü, miji jangru; aser ni jembitsü tenzük,

⁴“Oh KIBUBA, kü taküm tatembang, aser kü anogotem kwika kü nem metetdakjang; aser kü arishi koda tatsü aji metetdakjang.”

⁵Nai kü anogotem aka piga dang yanglu, kü arishi ajonga ne madang kecha nunga. Oda alima nung alir meimchir ajak tangula dang lir. (Selah)

⁶Akhüm ka ama parnok oli aruli ta jajar, aser parnoki bendenba rongsentemji tangula ka ama, aji shibai rizüngtsü parnoki memetet.

⁷Süra tang KIBUBA, ni kechi asoshi atatsü? Kü teimla ne dak lir.

⁸Ozüng raksaba ajak nungi nai ni sotang, tamashiri sensatsütsüsa ni tekümdaktsü.

⁹Ni mokorai liasü aser kü tebang melapok, kechiaser item ajakji nai dang inyak.

¹⁰Ne temerenshi kü dak nungi piladakjang, ne temerenshi agi ni aniseta lir.

¹¹Tai menaba atema nai nisung merenshir, shipo agi ama nai parnok chimar, atangji meimchir ajak tangula ka dang lir. (Selah)

¹²Kü sarasadem angang, Oh KIBUBA, ni ayimtenba nung tenarong tenang; kü nüktzü ngur nai ola madoki teli. Kechiaser kü tsüraburtem ama ne den bendanglen amunger ka ama lir.

¹³Kü taküm tatembang kati marudang, ni ano khen pela-a alitsüsa kü kija tokjang.