Read njo TENÜNGSANG KEN 40 Bible Online

TENÜNGSANG KEN 40 - njo bible

TENÜNGSANG KEN 40

¹Ni KIBUBA asoshi arema ata, aser pai kü tsütsü meyipa ni ayimtenba angashi.

²Pai ni tetsübutsü kangla lishitsüng nungi anitet; pai kü tsüng lungma nung noktakdaktsü, aser kü mera kümzüka ayu.

³Pai kü bang nung ken tasen ka enoktsü, oda asen Tsüngrem nüngsang ken ka. Aikati aji angutsü aser tsübutsü, aser parnoki KIBUBA dak temulung alemtsü.

⁴Shibai KIBUBA dak temulung lemdir, aser asükümer dak merangloker mesüra tiyazü tsüngremtem tsütsüi memeyiper pa tepelatsü.

⁵Oh KIBUBA kü Tsüngrem, nai onok asoshi inyakbatemji onsara tesüngmangtsü lir! Nai onok asoshi bilembaji aika lir; ne den medemdangtsüsa shinga melika! Item indang ni lepshia ashitsü asübo, mezüngdangmai onsara aika lila.

⁶ Tarongba tenla aser tenlatsü oset nung nai mepelar nai kü narong lapoktsüogo; tarongba tenla aser temenen tenla nai memeshir.

⁷Idangji ni ashi, “Ajiang ni yangi lir, kaket nung kü indang yamai zülua lir.

⁸Oh kü Tsüngrem, nai mulungba inyaktsü ni jangrar, kü mulung telunglen ne ozüng lir.”

⁹Mungdang tulu nung ni ne temeshiba metetdaktsüogo, ni ne indang memetetdaktsüi mali ta nai metet, Oh KIBUBA.

¹⁰Ni kü mulung nung ne temeshiba miima mayu, ni ne tamang katetba aser tekümtet indang metetdaktsüogo. Mungdang tulu madang ni ne temeim, aser ochi indang mejembi-i maliasü.

¹¹Oh KIBUBA, ne temeim taochi ni nungi tesot, ne temeim aser ochi agi ni maneni sota yuangma.

¹²Züngdangtsü makokba timtem jenti agi ni meketbangogo, kü tai agi ni menepogo, angji ni angutsü makoker. Parnokji kü kolak ku dang nungia timba, aser ni tasü maiti kümogo.

¹³Oh KIBUBA, arung aser ni kümzükang, Oh KIBUBA, ni yaritsü ilungang.

¹⁴Shiri kü taküm agitsü bushir, parnok ajak mak südakjang aser tamadakjang; shiri ni samatsütsü jangrar, parnok ajak maksüa tesülen shidakjang.

¹⁵Shiri kü dang “Aha! ta ashir, parnok tamakok nung mak südakjang.

¹⁶Saka shiri na bushir parnok ajak ne dak peladakjang, Shirnoki ne tekümtet meimer, parnoki teti “KIBUBA uludakjang” ta shidakjang.

¹⁷Saka nibo sensaker aser anüngakonger, KIBUBAi kü indang bilemtsür. Na kü teyarir aser kü tekümzüker, Oh kü Tsüngrem, menua teli.