Read njo TENÜNGSANG KEN 42 Bible Online

TENÜNGSANG KEN 42 - njo bible

TENÜNGSANG KEN 42

¹Mesüi ayongtzü yongyaba ama, ni na asoshi yongyar, Oh KIBUBA.

²Kü nelai Tsüngrem oda taküm Tsüngrem asoshi tzürar, ni kodang aotsü aser Tsüngrem jak angutsü?

³Kodang nisungtemi, “Ne Tsüngrem kong lir?” ta asüngdangdir, mangli sangwali kü nüktzü chiyung shizüka ayimer.

⁴Kü mulung nung tejashi tokzüka yutsüdang, ni ibai bilemteter, kodang telok den külemi ni Tsüngrem kidangi ao, tepela ola aser tenüngsang agüja ayimtenba telokji ni anir ao.

⁵Oh kü nela na kechiba tipmatemer? Kechiba na kü telunglen jashir? Tsüngrem dak imla-ang, kechiaser ni pa asangtsü. Kü tekümzüker aser kü Tsüngrem.

⁶Oh kü Tsüngrem, kü taküm temulung makai kümogo; anungji Yordan lima aser Hermon tenem aser Mizar tenem kolak nungi ni na bilemtettsü.

⁷Ne tzüyim tarok ola arrürba ama, aser tzüyim tzüsem nungshiba ajak kü madak aor.

⁸KIBUBAi anüngdang pa temeim aser aonung pa nüngsang ken ka aser kü taküm Tsüngrem dang sarasademba ka kü den lidakjang.

⁹Ni kü Tsüngrem, kü lung dang ashitsü, kechiba nai ni amadok? Kü tsükchiri kangshiba yong kechiba ni mang yimdaktsür?

¹⁰Kü tsükchiri kangshiba yong kü teret teraksa lir, anogo tepiyong parnoki “Ne Tsüngrem kong lir?” ta kü dang asüngdanger.

¹¹Oh kü nela, na kechiba tipmatemer? Kechiba na telunglen jashir? Tsüngrem dak imla-ang, kechiaser ni pa asangtsü pa kü tekümzüker aser kü Tsüngrem.