Read njo TENÜNGSANG KEN 44 Bible Online

TENÜNGSANG KEN 44 - njo bible

TENÜNGSANG KEN 44

¹Oh Tsüngrem, akhidang tetsü-tebou mapang nung nai kechi mapasa inyak, item indang onok narongi angashia parnoki onok dang shiogo.

²Nai ne teka agi kintemji aridok, aser ozü tsüraburtem linük nungji lidaktsü; nai kintemji kangshi, saka ne nüburtem moatsü.

³Kechiaser parnok nok agi alimaji makok, mesüra par nok o nü agi takok mangu. Saka ibai ne teka tajichi agi aser ne tepen agi aser ne tejak tesangwa agi lir, kechiaser nai parnok dang meim.

⁴Na kü chuba, kü Tsüngrem, shibai item takoktem Yakob nem agütsü.

⁵Na ajanga onoki onok anemertem laodaktsütsü; ne tenüng ajanga onoki onok anemertem dak ajemshitsü.

⁶Kechiaser ni kü lasang dak temulung malemer, mesüra kü nok agi kü nem takok magütsür.

⁷Saka onok anemer madak nai onok nem takok ngudaktsüogo, aser onok sempartem mak südaktsüogo.

⁸Anogo tepiyong Tsüngrem dak onoki mezümekümogo, tatem makai onoki ne nüng asangtsü. (Selah)

⁹Saka tangbo nai onok sentokogo aser ajemrepdaktsüogo, aser ozü temeranger telok den na maor.

¹⁰Onok tsükchirtem nungi nai onok meyipdaktsür, aser shiri onok sempar parnoki onok meyong rakzükraktemer.

¹¹Tetepsetdaki aoba san ama nai onok kümdaktsüogo, kintem rongnung nai onok prokshidaktsüogo.

¹²Kecha jenjang makai nai ne nübur ayok, aser iba ayokba nungji tajangzük mangu.

¹³Onok kiyonger tsüngdang nai onok temenütsütsü ka kümdaktsüogo, onok meketa alirtem tsüngdang onok tatalatsü ka kümdaktsüogo.

¹⁴Kintem rongnung nai onok telatetshitsü ka kümdaktsüogo, nisungtemi onok dak parnok kolak angümloktsür.

¹⁵Anogo tepiyong kü mera maketba kü madang lir, aser kü tejak maksü agi nembangogo;

¹⁶Tarütsü aser tatalartem alibayong, tsükchir aser mangyanger aliba agi.

¹⁷Onoki na mamadokaka, mesüra ne tezüngzüktepba nung meyazüaka, item ajak onok dangi aruogo.

¹⁸Onok mulungjang meyipa mao, aser ozü tetsüng ne lenmang nungi mepila.

¹⁹Aji saka nai onok teyari makadak arem shirongtem rongnung toktsü, aser ammang temelem agi onok nembangtsüogo.

²⁰Onoki ozü Tsüngrem tenüng amadoker lira; mesüra bendanger tsüngrem dang onok teka mekanger lira,

²¹Tsüngremi aji mebushitettsü ama? Kechiaser pai temulung telungtiba nung alibajia meteter.

²² Aji saka na atema anogo tepiyong onok tepseter, tetepsettsü san ama onok züngshir.

²³Sakang, na kechiba mejanger, Oh KIBUBA? Aramesoang, tatem makai onok teindok.

²⁴Kechiba nai ne tejak miimer, mesüra onok timtem aser tekangshi amadoker?

²⁵Kechiaser onok auyi tashi angüma lua lir, onok temang ali nung ajemsatsüogo.

²⁶Aramesoang aser onok yariang; ne temeim yimlibilem atema onok kümzükang.