Read njo TENÜNGSANG KEN 45 Bible Online

TENÜNGSANG KEN 45 - njo bible

TENÜNGSANG KEN 45

¹O tajung agi kü mulungjang moshia lir, chuba atema ni iba ken tenyudang; tezülur tajung kolem ama kü temeli renema lir.

²Nisung chir rongnung na tobur tajungtiba, ne tebang mechi yimlibilem agi sünga lir, anungji Tsüngremi na tatem makai moatsüogo.

³Oh tulusang, ne nok nokleptsü nung semang, tamarenba nung sentsüwangshia;

⁴Ne tamarenba nung takok ngua sayur, ochiba, ajemaluba aser temeshiba nung; ne teka tajichi agi tetsübutsü mapatem sayudakjang.

⁵Ne lijakjang techira agi chubar tsükchirtem mulung ateta atsünger, nüburtem ne tsüng kübok laodakjang.

⁶ Oh Tsüngrem, ne yimli tatem makai alir, nai ne nüburtem madak ochi agi yimsü asütsü.

⁷Nai temeshiba meimer aser temenen sempar, anungji Tsüngrem, ne Tsüngremi na shimtet; ne nüburtem madak tepela totzü mezüja na shimtet.

⁸Ne süoshi ajak nung teronem menemba aloe aser kasia menemer, shiti pu agi yangluba chuba ki nungi tzürang kongki agi na peladaktsür.

⁹Ne tetushi tetsürtem rongnung chuba jalatem dena lir, ne teka tajichilen ofir hon sobuba chubatsür noktaka lir.

¹⁰Angang, Oh jala, aser bilemdangang, aser ne tenarong tenang, ne nübur aser nebu kia amadokang.

¹¹Idangji chubai ne tobur ajungji aginütsü, pa ne kibur asünung nai pa dang angatsüla.

¹²Tair jala sempet bener na mesüzüktsü arutsü, nüburtem rongnung takaria ne yimlibilem mepishitsü.

¹³Chubatsürji la menden nung sentsüwangshia lir, la süoshi nung hon takoka lir.

¹⁴Sentsü aika aketba süoshi agir la chuba dangi anir aor, la tasüngtet medemertem la sülen anitaker, aser parnok ne dangi anir aor.

¹⁵Pelatepa aser lungsotepa parnok anir aor, aser parnoki chuba kidangi air.

¹⁶Ne tsüraburtemji ne jabasotemi melentsü, aser nai parnok alima ajak nung chuba kümdaktsütsü.

¹⁷Putu ajak nung ni ne tenüng bilemtetdaktsütsü, anungji kintemi tatem makai ne nem tenüngsang agütsütsü.