Read njo TENÜNGSANG KEN 46 Bible Online

TENÜNGSANG KEN 46 - njo bible

TENÜNGSANG KEN 46

¹Tsüngrem asen jenokdak aser tashi, timtem nung anasatiba teyarir.

²Anungji alimaji anokshiaka, aser tenemtem, tzüyim tiyongi ajungokaka onoki metsübutsü;

³Oda yangji aliba tzü arraka aser nungshiaka, mesüra iba nungshiba jagi tenemtemji anokshiaka. (Selah)

⁴Ayong ka lir aser iba ayongnutem jagi, Tsüngrem yimti tematiba alidakji peladaktsür.

⁵Tsüngrem yangji lir, aji marakzütsü, ibaji yaritsü Tsüngrem teyarir yakta arutsü.

⁶Kintemji atentener, yimtitem anokshir, pai ola adokdang alima yimsa-a aor.

⁷Temeranger KIBUBA asenok den lir, Yakob Tsüngrem asen jenokdak lir. (Selah)

⁸Arung, KIBUBA mapatem aser pai alima nung, kechi teraksa inyak ajiang.

⁹Alima tatem tashi nung pai rara anendaktsür, pai lasang raksar, nü leptanger, aser rara nung amshiba jong mi nung aronger.

¹⁰“Ajemajema liang aser ni Tsüngrem ta metetang, kintem rongnung ni ajungkettsü, alima nung ni ajungkettsü.”

¹¹Temeranger KIBUBA asenok den lir, Yakob Tsüngrem asen jenokdak lir. (Selah)