Read njo TENÜNGSANG KEN 48 Bible Online

TENÜNGSANG KEN 48 - njo bible

TENÜNGSANG KEN 48

¹KIBUBAji tulu lir, aser asen Tsüngrem yimti temeshi tenem nung asangtsüla.

² Tobur tajung aser jangratemtsü Zion tenemji alima ajak tepela, chuba tulu yimti tenem talang anüdoklentip nung lir.

³Yangji aliba chuba yimti nungji, Tsüngrem parnok jenokdak asütsü ta pai sayuogo.

⁴Kechiaser ajiang chubatem külemi sentep, aser ibaji anema atu.

⁵Kodang parnoki aji angu, parnoki süngmang, aser tetsübu agi parnoki jena ao.

⁶Parnok dak tetsübu aser tatenten agi atong, tetsür nuso ashi ama parnok kangshi.

⁷Anüdok mopung agi Tarshis rong raksatsüba ama, nai parnok raksatsü.

⁸Onoki angashiba aser anguba ama Temeranger KIBUBA yimti nung, asen Tsüngrem yimti nung Tsüngremi aji tatem makai kümzüktsü. (Selah)

⁹Oh Tsüngrem, ne tekülemdak, onoki ne temeim yimlibilem indang shisadangogo.

¹⁰Oh Tsüngrem, ne tenüng ama ne nüngsang alima tatem tashi tonga aor. Ne teka tajichi temeshiba agi sünga lir.

¹¹Ne obendang atema Zion tenemi peladakjang, Yihuda yimtitemi ne obendangba nung peladakjang.

¹²Zion ajanga oang, la meketa jaja-ang, aser la lungkitem züngdangang.

¹³La yim tsükitem jungjunga ajiang, aser lar chuba kitem ajanga oang, anungji nenoki tarutsü putu dang iba indang shitettsü.

¹⁴Kechiaser ibai Tsüngrem teti tatem maka asen Tsüngremji lir; tatem tashi pa asen leniba alitsü.