Read njo TENÜNGSANG KEN 49 Bible Online

TENÜNGSANG KEN 49 - njo bible

TENÜNGSANG KEN 49

¹Kin ajaki ya angang, iba alima nung alir ajaki angang,

²Tulur aser tilar, sensaker aser takar ajaki.

³Kü tebangi shisatsü o jembitsü, kü mulungjang tangatetba agi sünga alitsü.

⁴Shin o tsütsü ni kü narong atentsü, aser kongki agi ni itemji ratettsü.

⁵Tamajung anogo arudang, kodang kü tsükchir tai agi ni meketbanger;

⁶Shiri pei rongsen dak temulung alemer, aser parnok rongsen aliba yong, mezümekümdang ni kechiba tsübutsü?

⁷Parnok shingaia pei taküm malangzüktet, mesüra pei taküm jenjang Tsüngrem nem magütsütet.

⁸Taküm alangzükba jenjangji onsara tulu, kecha agia iba den medemdangtsü makok.

⁹Aji oda mesüra pai tasüba nungi, teti taküm koda litettsü.

¹⁰Kechiaser shisa taka nisung asür, tamachi aser shisa makar külemi samar; aser parnok rongsen tangar nem toktsür ta pai teti angur.

¹¹Khenbo parnoki pei li nem pei tenüng agüjaka, putu ajak nung tatem makai alitsüba parnok kiji parnok lepertemji lir.

¹²Saka nisungi pei uluba agi aji mesottet, kechiaser pa tesamatsüba shiruru ama lir.

¹³Pei dak temulung alemertem, aser parnoki ashiba sülen anitakertem tia ya lir. (Selah)

¹⁴San ama parnok Sheol asoshi renema lir, aser tasübai parnok anüktsü, tindang nisungi anepdang parnok madak yimsü asütsü. Parnok temang leper nung shireptsü, Sheol parnok talidak alitsü.

¹⁵Saka Tsüngremi ni Sheol ain nungi alangzüktsü, kechiaser pai ni pa dangi agizüktsü. (Selah)

¹⁶Kodang nisung ka takar kümdir, kodang pa rongsen tali ulua kümdir nai pa dak tenük temerem.

¹⁷Kodang pa südir, pai pa den kecha bener maotsü, pa rongsen aser akhüm pa sülen maotsü.

¹⁸Pa taküm alidang pa sasa pela-a liaka, aser pa rongsen asoshi nisungtemi pa sangaka,

¹⁹Pa pei tebutem putu nung adentsü, shirnoki tesangwa kodanga mangutsü.

²⁰Nisung shiba tangatetba makai takar akümer, paji tesamatsüba shiruru ama lir.