Read njo TENÜNGSANG KEN 5 Bible Online

TENÜNGSANG KEN 5 - njo bible

TENÜNGSANG KEN 5

¹Oh KIBUBA, kü o nung tenarong tenang, kü tanüngba angang.

²Teyari asoshi ni ayimtenba ola angang, kü chuba aser kü Tsüngrem; Kechiaser ni ne dang sarasademer.

³Oh KIBUBA, anepdang nai kü ola angashir, anepdang ni kü temepishiba ne dangi abentsü, aser yongyaseta atatsü.

⁴Na tamajung nung pelaba Tsüngrem ka masü; Ne den temenen alitsü makok.

⁵Mezümekümeri ne nükdang menoktaktsü; Nai temenen benshir ajak sempar.

⁶Tiyazü jembirtem ajak nai samatsür; Azü jangraba aser tekülak KIBUBAi sempar.

⁷Saka nibo ne taochi tulu ajanga ne kidangi aitsü; Ne temeshi tekülemdak na tsübuseta ni ne dang külemtsü.

⁸Oh KIBUBA, kü tsükchir jenti ali nung, ne ochiba dangi ni aniang; Kü jakdang ne lenmang indanga yanglujang.

⁹ Parnok tebang nungi adokba o ka danga tamangtsü mali; Parnok temulung teraksa agi sünga lir. Parnok trok lapoka aliba leper lir; Parnok temeli agi tiyazü jembir.

¹⁰Parnok tai ta metetdakjang Oh Tsüngrem; Parnok tasa agi parnok laodakjang. Parnok tai jenti asoshi merenshiang, kechiaser parnoki na anema apuso.

¹¹Saka shiri ne dak jenoker parnok ajak peladakjang; Parnok nem tepela ken teti tendakjang. Shirnoki ne tenüng meimer parnok pelatsüsa ne tekümzükba parnok madak lidakjangma.

¹²Kechiaser nai temeshipur moatsür; Oh KIBUBA, jong agi ama ne temeim agi parnok awabanger.