Read njo TENÜNGSANG KEN 50 Bible Online

TENÜNGSANG KEN 50 - njo bible

TENÜNGSANG KEN 50

¹Takoksang Tsügrem, KIBUBAi jembiogo, aser anüdok nungi anülu tashi alima pai jazükogo.

²Tobur tajung teperiba Zion nungi Tsüngremi yaloktsütsü.

³Asen Tsüngrem arudagi, saka ola madoki masü, pa jakdang tetsübutsü tarongba mi lir; aser pa meketa tetsübutsü yipru lir.

⁴Pai pei nübur o bendangtsü asoshi, temalen anüngtem aser alima ajatsü.

⁵“Kü temeshibatem, shiri tenla ajanga kü den tezüngzüktepba yangluogo; parnok kü dangi külemi anitenang.

⁶Anüngtemi pa temeshiba metetdakjang, kechiaser Tsüngrem pei sasa obendanger lir.” (Selah)

⁷Angang, Oh kü nübur aser ni jembidi, Oh Israel, ni ne nem kuli agütsüdi; ni Tsüngrem, nenok Tsüngrem lir.

⁸Nenok tenlatem asoshi ni nenok marütsür, nenok tarongba tenlatem kü jakdang lir.

⁹Ni nenok ki nung nashi pungchi, mesüra nabong ki nungi nabong tepung magitsü.

¹⁰Kechiaser arem shiruru ajak, aser kü tenemtem nung aliba nashi ajak kü meyong.

¹¹Tenemtem nung aliba ozü ajak ni metet, arem nung senzüba shiruru ajak kü meyong.

¹²“Ni yaseta alinungbo ni ne dang aji meshila, kechiaser alima aser yangji aliba ajak kü meyong lir.

¹³Ni nashi pungchi shi chidi ma? Mesüra nabong zü jemdi ma?

¹⁴Ne tenüngsang tenla Tsüngrem nem agüjang, aser tematiba nung aliba nem ne tezüngzükba agüjang.

¹⁵Timtemba anogo nung nai kü dang ja-ang, ni na kümzüktsü aser nai ni sentsüwangshitsütsü.”

¹⁶Saka tamashi nisung dang Tsüngremi ashi, “Kechi atema nenoki kü ozüngtem tetshitsü, aser kü tezüngzüktepba ne bang nung ayutsü?”

¹⁷Kechiaser nai kü tesayuba sempa, aser ne tesülen kü otem endoker.

¹⁸Nai kodang auür ka angu, pa den haura aka, aser nüktapangtartem den shilem lemzüker aküm.

¹⁹Temenen nem nai ne tebang agütsü, tashioktsüba nem ne temeli agütsür.

²⁰Nai mener ne adianu anema jembir, aser pei tetsüri asoba adianu anema mezüngmeshi o jembir.

²¹Itemi nai inyakaka ni ola madoki liasü, nai niji na ama dang ta bilem; saka tang ni na merenshitsü, aser item ajak ne madaki arutsü.

²²Nenok shiri Tsüngrem amadoker, ibai bilemdangang, aji oda mesüra ni nenok anüka shisatsü aser tekümzüker shinga malitsü.

²³Shirisa tepela tenla agütsür parnoki kü dang akhüm tsübur; aser shibai kü lenmang sülen anitaker pa dang Tsüngrem tekümtet sayutsü.