Read njo TENÜNGSANG KEN 51 Bible Online

TENÜNGSANG KEN 51 - njo bible

TENÜNGSANG KEN 51

¹Oh Tsüngrem, ne temeim yimlibilem yari kü dang aochiang; ne tabensa taochi tulu yari kü ozüng raksaba tai endokjang.

²Kü tai ajak nungi meshimeshia ni shitokjang, aser kü temenen nungi ni merüktetjang.

³Kechiaser ni ozüng raksaba taitem nangzüker, aser kü temenen teti kü jakdang lir.

⁴ Na anema, na anema dang ni temenen menaogo, aser ne nükdang kechi majung aji inyak. Anungji kodang nai jembidir, na shitak ta kuli angur, aser ne obendangbaji merüka lir.

⁵Atangji ni temenen nung yanglu; temenen nung kütsüi ni aben.

⁶Nai temulung telungtiba nung ochi aginür, aser temiimdak nai kü dang shisatsü sayur.

⁷Esop agi ni meshitetjang aser ni merüka alitsü, ni shitokjang aser ni rürjeb dang temesüngba alitsü.

⁸Kü nem tepelaba olatem angashidakjang, anungji nai raksatsüba tereti pelatsü.

⁹Kü temenentem nungi ne tejak meyipang, aser kü tai ajak aidokjang.

¹⁰Oh Tsüngrem, kü dak temulungjang temerük ka poktetdakjang, aser shitakba asentenshi tanela ka kü dak poktetdakjang.

¹¹Ne tsüngdang nungi ni teindok, aser ne temeshiba tanela kü dak nungi tagien.

¹²Ne tekümtet kü dangi meyipdakjang, aser nüji tanela agi ni sotang.

¹³Idangji ozüng raksartem dang ni ne lenmang sayutsü, aser temenen puri ne dangi temulung meyiptsü.

¹⁴Oh Tsüngrem, na kü tekümtet Tsüngrem, azü tokshiba tai nungi nai ni kümzükang aser kü temeli-i ne temeshiba indang ken atentsü.

¹⁵Oh KIBUBA nai kü tebang lapokjang; aser ni ne nüngsang ken atentsü.

¹⁶Kechiaser nai tenla nung mepelar mesüra ni aji agütsüla; nai tarongba tenla nunga mepelar.

¹⁷Tsüngremi aginüba tenlaji tanela teraksaji lir, ajemalu aser temulung teraksaji nai mezüngmeshi masütsü.

¹⁸Ne taochi yari Zion dang tajung inyakang, aser Yirusalem jaratem yangluang.

¹⁹Idangji shitakba tenlatem, tarongba aser rangben tarongba tenla nung nai pelatsü, aser ne tenla sabang nung nashi pungchitem tenlatsü.