Read njo TENÜNGSANG KEN 55 Bible Online

TENÜNGSANG KEN 55 - njo bible

TENÜNGSANG KEN 55

¹Oh Tsüngrem, kü sarasadem angang, kü temepishiba nungi miima teli,

²Kü dang angang aser langzüang. Kü timtem aser tanüngba nungi ni anisüngzük maka.

³Tsükchirtemi ni anema ayimtenba yong, tamajungeri ni kangshiba yong; parnoki ni anema timtem agütsüba yong, ain adoka parnoki mezüngmeshir aser sempar.

⁴Kü mulung tejashi agi raksa-a lir, aser tasütsü tetsübu kü madaki arua lir.

⁵Tetsübu aser tatenten kü dak tonga lir, taoksaba agi ni meketbangogo.

⁶Ni ashi, “aia, ni posü ama tashikang lilasang! Ni yima or anisüngzükla.

⁷Talangi ni yima ola, aser idakji arem min nung ni kü ki yanglula. (Selah)

⁸Yipru mopung aser tsüngsak nungi, ni yakta kü jenokdaki aotsü.”

⁹Oh KIBUBA, kü tsükchirtem o benjadakjang, kechiaser yimti nung azü tokshiba aser raratepba ni nguogo.

¹⁰Mangli-sangwali parnoki yimti jaraji meketbanger, ibai timtem aser tejashi agi sünga lir.

¹¹Iba telunglen teraksa agi sünga lir, tekangshi aser tashioktsüba yimti yimtong nungi mepilar.

¹²Oda tsükchiri ni arütsür asübo ni itemji aremzükla; kü anemer kari pa sasa ni anema noktaker asü nungbo ni pa nungi atsükla.

¹³Saka ibaji na, kü medemer, kü temulung lemtetba kü tembar.

¹⁴Shiba den ni khen mapang, Tsüngrem kidang anasatiba telungjem nung jaja,

¹⁵Parnok dangi aoksa-a tasüba arudakjang, kangla jagi parnok taküm idakjang, kechiaser parnok ki aser temulung nung temenen alir.

¹⁶Saka nibo Tsüngrem dang aja, aser KIBUBAi ni kümzük.

¹⁷Nikongdang, anepdang aser anüngdang, timtem nung ni ayimten, aser pai kü ola angashi.

¹⁸Ni anema adokba rara nungi pai kü taküm meyirutsüi alangzükogo, kechiaser kü den rarar jenti liasü.

¹⁹Tsüngrem, shiba chuba menden nung tatem makai mena lir pai aji angashitsü aser parnok merenshitsü. (Selah) Parnok dak temelenshi kecha mali nung, parnok dak Tsüngrem tsübuba mali.

²⁰Item nisung jagi parnok den yimjung nung alirtem anema apusor, aser parnok tezüngzüktepba raksar.

²¹Pa oji mamatzü temo ama tesüsü, saka pa mulung nung rara lir; pa oji totzü dang nungia tanükba, saka itemji nok techira ama lir.

²²Ne khuret ajak KIBUBA dak enlokjang, aser pai na kümzüktsü, pai temeshi nisungji kodanga marakzüdaktsütsü.

²³Saka, Oh Tsüngrem, nai parnok tasütsü kanglai yoktsü, azü jangraba aser tekülak nisungi pei arishi küm tesadang kata malitsü. Saka nibo ne dak amangtsü.