Read njo TENÜNGSANG KEN 57 Bible Online

TENÜNGSANG KEN 57 - njo bible

TENÜNGSANG KEN 57

¹Kü dang aochiang, Oh Tsüngrem. Kü dang aochiang, kechiaser ni ne dak jenoker. Item lendong mesüitem tashi ni ne tashikang akhümbok nung jenokdi.

²Tematiba Tsüngrem shibai ni asoshi, ajak inyaker ni pa dang ayimten.

³Pai kotak nungi yoka ni kümzüktsü, shiri kü madak ajemshir pai parnok maksüdaktsütsü. (Selah) Tsüngremi pa yimlibilem aser tamang katetba kü dang sayutsü.

⁴Ni nisung shi achitsü jangraba molusongzütem rongnung lir, shirnok tepu nü aser lijakjang ama, aser parnok temeli noklang nok ama techira.

⁵Oh Tsüngrem, anüngtem temalen na ajungketang, ne sentsüwangshi ali ajak madak lidakjang.

⁶Ni aputsü asoshi parnoki kü lenmang nung sang ka yuogo, ni teimla makai lir. Parnoki kü lenmang nung kangla ka tuogo, saka parnok pei sasa iba tiyong nung tsüka lir. (Selah)

⁷Kü mulung marakzüi lir, Oh Tsüngrem, kü mulung marakzüi lir, ni ne nüngsang ken atentsü.

⁸Sakang, kü nela, jemji aser kongki renemang, ni kü sasa anepdang yakta saktsü.

⁹Kintem rongnung ni na asangtsü, Oh KIBUBA, nüburtem rongnung ni ne nüngsang ken atentsü.

¹⁰Kechiaser ne yimlibilem anüng tashi, ne ochi tamang katetbaji mepet tashi.

¹¹Oh Tsüngrem, anüngtem temalen na ajungketang, ne sentsüwangshi ali ajak madak lidakjang.