Read njo TENÜNGSANG KEN 58 Bible Online

TENÜNGSANG KEN 58 - njo bible

TENÜNGSANG KEN 58

¹Yimsüsürtem, nenoki atangji ochi jembia lir ma? Meimchir ajak dang nenoki ochi agi o bendanga lir ma?

²Masü, nenoki temulungjang nung tamajung inyaktsü bilemer, nenok tekai alima nung azütokshiba mapa inyaker.

³Tamajungerji nu menden nungi mashileni aor, aser tiyazü jembir.

⁴Parnok mim per mim ama lir, tenarong tangpanger aliba ongyang per mesüka parnok lir.

⁵Kobai per puar ola mangashir, mesüra tesangra kentener ola mangar.

⁶Oh Tsüngrem, parnok tebang nung parnok tepu raksajang, Oh KIBUBA, molusongzü chanutem tepuji loksajang!

⁷Tzü yima aoba ama parnok mungui kümdakjang. Parnokji nisung tetsüng agi ajemshiba rem ama takong kümdakjang.

⁸Yimsa-a aoba küpra ama, tasü asoba kinüi anü mungudang ama lidakjang.

⁹Chipoi ongchirang süng takong nung jangrua aliba mi tatsük memetetdang, tajem süshia jangrua aliba süshia, parnok yakta mopungi oner aotsü.

¹⁰Mang ayangbaji angudang temeshipurtemi pelatsü, aser tamajunger azü nung parnoki pei tetsüng shitoktsü.

¹¹Idangji nisungtemi ashitsü, “Atangji temeshipurtem asoshi sempetji lir, atangji alima nung obendangba Tsüngrem ka lir.”