Read njo TENÜNGSANG KEN 59 Bible Online

TENÜNGSANG KEN 59 - njo bible

TENÜNGSANG KEN 59

¹Oh kü Tsüngrem, kü tsükchirtem nungi ni kümzükang, ni anema noktakertem nungi ni kümzükang.

²Temenen inyakertem nungi ni sotang, azü jangrartem nungi ni kümzükang.

³Kechiaser reprangang, parnoki kü taküm asoshi mita atar; tashi taitertemi ni anema senteper. Kü tai mesüra kü temenentem atema masü, Oh KIBUBA.

⁴Kechiaser kü dak tai mali sür nung parnoki asemer aser renemer. Aramesoang, KIBUBA, temeranger telok.

⁵Oh, Tsüngrem, Israel Tsüngrem, ni kümzükang. Kin ajak merenshitsü aramesoang, tamajung inyaker shinga danga yimlibilem tesayu. (Selah)

⁶Parnoki nikongdang meyipa shilanger, aser azü ama ola adoka, yimti meketa aor.

⁷Ajiang, parnoki pei tebang agi asanger, parnok tebangmechi nung nok lir, aser parnoki ashir, “Shibai onok dang angar?”

⁸Saka Oh KIBUBA, nai parnok menütsütsü; mamangba pur ajak nai atalatsü.

⁹Oh kü tashi, ni na atadi, Oh Tsüngrem, na kü mitsa tulu lir.

¹⁰Kü yimlibilem Tsüngremi kü dangi arutsü; kü tsükchirtem madak takok angubaji pai kü nem ngudaktsütsü.

¹¹Parnokji tetepset Oh Tsüngrem, aji mesüra kü nüburtemi amadoktsü, Oh KIBUBA, ozü jong, ne tashi agi, parnok anizükang aser prokshidakjang.

¹²Parnok tebang nung temenen aser parnok tebangmechi otem atema, parnok pei asüküm nung pudakjang, kechiaser parnoki atakatem aser tiyazü jembiogo.

¹³Ne ain adok nung parnok samajang, parnok taküm malitsüsa samajang. Idangji Yakob madak Tsüngremi yimsü asür, aser alima ajak madak pa KIBUR ta nisung ajaki metettsü. (Selah)

¹⁴Parnoki nikongdang meyipa shilanger, aser azü ama ola adoka yimti meketa aor.

¹⁵Azüi chiyungtsü bushia senzüba ama, parnoki peria mangu tashi senzütsü.

¹⁶Saka nibo ne tashi indang atentsü, anepdang ne temeim indang ni ken atentsü, kechiaser na kü mitsa, timtem mapang nung kü jenokdak.

¹⁷Oh kü tashi, ni ne nüngsang ken atentsü; Oh Tsüngrem, na kü mitsa, kü dang meimba Tsüngrem.