Read njo TENÜNGSANG KEN 60 Bible Online

TENÜNGSANG KEN 60 - njo bible

TENÜNGSANG KEN 60

¹Oh Tsüngrem nai onok sendokogo, nai onok raksatsüogo, na ain adoka liasü, saka tang onok dangi meyipang.

²Nai alimaji atentendaktsüogo, nai aji shimatsüogo; iba teraksaji anebjang, kechiaser aji anokshir.

³Nai ne nübur dang timtemtsü sayuogo, onok mangatentsüsa nai onok nem yi jemdaktsüogo.

⁴Saka shirnoki na tsübur parnok nem tekümdangtsü ka nai agütsüogo, anungji teraksatsüba nungi parnok kümzüktsü. (Selah)

⁵Ne teka tajichi agi onok kümzükang aser yariang, anungji nai shir dang meimer parnokji kümzüktsü.

⁶Tsüngremi pei temeshidak nungi jembiogo, “Tepela nung ni Shekem lemsatsü aser Sukkot lenten lemsatsütsü.

⁷Gilead kü meyong, aser Manase kü meyong. Efraim kü kolak kümzükba korang, Yihuda kü chuba nüsong.

⁸Moab kü shitokba po, Edom dak kü tsüngsem mereploktsütsü, Filistia anema ni kü takokba ayimtentsü.”

⁹Shibai tashi tait yimti jagi ni anir arutsü? Shibai ni Edom dangi anitsü?

¹⁰Oh Tsüngrem, nai onok mesendoka ma? Aser nai ozü temerangertem den maor.

¹¹Tsükchirtem anema onok nem teyari agüjang, kechiaser nisung teyaribo amajok.

¹²Tsüngrem den onoki takok angutsü, kechiaser pai ozü tsükchirtem madak ajemshitsütsü.