Read njo TENÜNGSANG KEN 62 Bible Online

TENÜNGSANG KEN 62 - njo bible

TENÜNGSANG KEN 62

¹Kü taküm Tsüngrem asoshi dang atar; pa nungi kü tekümtet arur.

²Paji dang kü lung aser kü tekümtet, pa kü mitsa takang, ni kodanga marakzütsü.

³Kechiaser tashi maitba jara aser atsü teraksa ama, tashi maitba nisung ka atema nenok kopiga mita atatsü?

⁴Ashioktsütsübaji parnok nükjidong mashileni anitsübaji parnok tejangraba lir. Parnoki tebang agi moatsür, saka telung nung atakatemer.

⁵Kü nela, nai Tsüngrem dak anisüngzükang; kechiaser kü teimla pa nungi lir.

⁶Paji dang kü lung aser kü tekümtet; pa kü mitsa tulu ni marakzütsü.

⁷Tsüngrem dak kü tekümtet aser kü sentsüwangshi lir; pa kü tashi aser lung lir.

⁸Oh nüburtem, nenoki mapang ajak nung pa dak amangang; pa tsüngdang nenok mulungjang lapokang; kechiaser Tsüngrem asen jenokdak lir. (Selah)

⁹Nisung ajak tangula ka ama dang lir; sensaker aser takar anaprongla jenjang kasa; parnok seret nung odang nung seret matutsü, parnokji tangula dang nungia tepungpaba.

¹⁰Ochi mashiba mapa dak tamang teyu, mesüra rakzükraktem dak amajok nung teimla; ne rongsen aika renlokaka ne mulungjang idakji teyu.

¹¹Tsüngremi khen jembiogo, ni ya anaben angashiogo; oda tashiji Tsüngrem meyong lir.

¹² Ano Oh KIBUBA, yimlibilem ne meyong lir; kechiaser nai nisung shia nem pei mapa yari agütsür.