Read njo TENÜNGSANG KEN 65 Bible Online

TENÜNGSANG KEN 65 - njo bible

TENÜNGSANG KEN 65

¹Oh Tsüngrem, Zion nung ne nem tenüngsang agütsütsü tetemsü; ne dang onok tenangzükbatem ataloktsütsü.

²Kechiaser nai sarasadem langzür; meimchir ajak ne dangi arutsü.

³Parnok temenentem atema, kodang onok temenentem agi onok kokdir nai itemji aidoktsütsü.

⁴Ne kidang alitsüsa nai shirnoksa shimtet aser anir aruogo, parnok tepelatsü. Ne kidang aliba tajungtem aser ne temeshi tenla ki temoatsütem jagi onok tipatemtsü.

⁵Oh Tsüngrem ozü tekümzüker, ne tesüngmangtsü mapa aser temeshiba agi nai onok dang langzütsü. Alima tatembang ajak aser tzüyim tatembangtibai ne mulung alemer.

⁶Nai pei tashi agi tenemtemji akanga yanglu, na ain agi nangri khanga lir.

⁷Tzüyimtemi arrürba aser tzüsemtem ola nai süngjemdaktsür, aser nüburtem rongrongba nai süngjemdaktsür.

⁸Talang nung alirtemi ne temaitsütem tsübur, alima tatem külen nungi külen tashi ne mapa agi tepela agütsür.

⁹Nai alimaji semdang aser tzü agütsü, nai aji kanga takar kümdaktsü. Tsüngremer ayongtemji tzü agi sünga lir, nai parnok nem tsük agütsütsü asoshi, aji oda nai yanglu.

¹⁰Ali angensa-a alibaji nai tzü agi medema süngdaktsür, nai aji tzünglu agi anüka kümdaktsür, aser tsünütsü meidaktsür.

¹¹Nai angati ajungba aluruba moatsür, aser ne kolenisa odir talubusa moatsür.

¹²Lisem lima ajak ali temo agi asüngtsü, aser tenem tilatem ajaklen pelateper.

¹³San telok agi chiyimdak moapuji sünga lir, lentenjia tsük agi sünga lir; parnoki tepela agi ayimtener aser ken atener.