Read njo TENÜNGSANG KEN 66 Bible Online

TENÜNGSANG KEN 66 - njo bible

TENÜNGSANG KEN 66

¹Alima ajaki Tsüngrem dang tepela ola adokang;

²Pa tenüng sentsüwangshi ken tenang, pa nem sentsüwangshi nüngsang agüjang.

³Ne mapatem koda tetsübutsü ta Tsüngrem dang shiang; ne tashi uluba agi ne tsükchirtemi tetsübu agi ne madang apudaktsü.

⁴Alima ajaki na külemtsü, parnoki ne dang ken atentsü, parnoki ne nüngsang ken atentsü. (Selah)

⁵Arung aser Tsüngremi inyakbatem ajiang, nisung rongnung pa tesüngmangtsü mapatem.

⁶ Pai tzüyim jagi ali takong kümdaktsür, anungji pei nüburtemi ayongji ajanga jaja. Idakji pai kechi inyak iba asoshi asenoki pa dang peladi.

⁷Pei tashi agi pai tatem makai yimsü asür, shiba tenük agi kintem madak ajir; tashi mangar shingaia anema tapusodaktsü. (Selah)

⁸Asen Tsüngrem moajang, Oh nüburtem, pa nüngsangba olaji angashidakjang.

⁹Shibai akümlir lima nung asenok lidaktsür, aser asen tetsüng memetsüdaktsür.

¹⁰Kechiaser nai onok tendangogo, Oh Tsüngrem, taribi tendangba ama nai onok tendangogo.

¹¹Nai onok sang nung pudaktsü, aser onok teperem nung khu taret benloktsü.

¹²Onok kolak manung nisungtem nem ajemshidaktsür, onoki mi aser tzü ajanga ao; saka nai onok takar linük kati aniok.

¹³Ni tarongba tenla ne kidangi bener arutsü, ni ne nem kü tenangzükba agütsütsü.

¹⁴Koba ni timtem nung alidang kü tebang mechi-i nangzükogo.

¹⁵Ni ne nem tejebketba shiruru tenla agütsütsü, san tepung, nashi pungchi aser nabong, tarongba tenla ni agütsütsü. (Selah)

¹⁶Nenok Tsüngrem tsüburtem kü dangi arung, aser pai kü dang kechisa inyak item ajak ni ne dang shidi.

¹⁷Ni pa dang tashi agi ayimten, aser kü temeli agi pa nüng asang.

¹⁸Ni kü mulung nung temenen sabu asübo, KIBUBAi kü dang mangala.

¹⁹Saka atangji Tsüngremi angashiogo, aser kü sarasademba ola pai angaogo.

²⁰Tsüngrem tenüng sangang, kechiaser pai kü sarasadem mesendok mesüra pa yimlibilem temeim kü dak nungi magien.