Read njo TENÜNGSANG KEN 68 Bible Online

TENÜNGSANG KEN 68 - njo bible

TENÜNGSANG KEN 68

¹Tsüngrem aramesodakjang aser pa tsükchirtem prokshidakjang. Shiri pa sempar, parnokji pa tsüngdang nungi jenshidakjang.

²Mopungi mokozü oner aoba ama, parnok aridokang; mi tsüngdang nirep yimsa aoba ama, tamajungertemji Tsüngrem tsüngdang samadakjang.

³Saka temeshipurtemji peladakjang, parnok Tsüngrem tsüngdang pelatepdakjang, parnoki tepela tulu nung ayimtendakjang.

⁴Tsüngrem dang ken tenang, pa nüngsang ken tenang; Shibai mepet manung mener aor, pa nem ken ka tenlokjang; Pa tenüng KIBUBA lir, pa tsüngdang nenok pelatepang.

⁵Lajar tebu malirtem, amitsür kümzüksang, aji temeshidak aliba Tsüngrem lir.

⁶Azüngmeyaka alir nem pai talidak ki ka agütsür, tepuokertem nem techiokba agütsür; saka tashi mangartem ali takong nung lidaktsür.

⁷Oh, Tsüngrem kodang nai ne nüburtem jakdang ao, kodang nai lisem limaji ajanga ao; (Selah)

⁸ Alimai atenten, aser anüngtemi tzünglu yok, Sinai Tsüngrem tsüngdangi, Israel Tsüngrem tsüngdang atenten.

⁹Oh Tsüngrem, nai tzünglu talubosa yok, ania aliba ne li nai yanglushiogo;

¹⁰Kong ne nüburtem parnok talidak nguogo; Oh Tsüngrem, nai ne ajungba nungi sensaker asoshi renemtsü

¹¹Kibubai ozüngji agütsür, aser telok tulu kati iba osangji abener.

¹²Chubatem aser par temerangertem ajener; parnoki ajener; Tetsürtem shir kidang alir parnoki temakzükba oset lemsar.

¹³Parnoki san ki nung mejanger, posü tashikang taribi agi aser la tezüng hon tanen agi meibanger lir;

¹⁴Ajak Takoksangi kodang chubatemji prokshidaktsüdir, Zalmon nung rürjeb tsükdaktsür.

¹⁵Oh tenem tulu, Bashan tenem; tenem mokji aika aliba tenem, Bashan tenem.

¹⁶Oh tenem mokji aika aliba tenem, kechiba nai Tsüngremi pa alitsü shimtetba tenem anema nai tenük merema repranger? KIBUBA yangji teti alitsü.

¹⁷Tashi tait meyong kor talungtsü, meyirijang teranasü, meyirijangsa merijang aika Kibubai Sinai tenem nungi pa tekülemdaki alur.

¹⁸ Nai tepuoker aika anir tenem talang jagi atu, aser nisungtem nungi sempet agizük; oda na anemertem nungia agizük, anungji KIBUBA Tsüngrem parnok den alitsü.

¹⁹Tsüngrem shiba asen tekümzüker lir, Kibuba shibai anogo shia asen khu abener pa tenüng sangang. (Selah)

²⁰Asen Tsüngremji tekümzüker Tsüngrem lir, Tsüngrem asen KIBUBAi asenok tasüba nungi kümzüker.

²¹Atangji Tsüngremi Pa tsükchirtem kolak zükreptsütsü, Shiri pei tai nung maneni aor parnok ku agi yangluba chuba korang kolakji zükreptsütsü.

²²Kibubai ashi, “Ni parnok Bashan nungi anir arutsü, ni parnok tzüyim tarok nungi anir arutsü.

²³Anungji nenoki tsükchirtem zü nung nenok tetsüng shitoktsü, aser nenok azütem temeli pei shilem ne tsükchir nungi angutsü.”

²⁴Oh Tsüngrem, na akhüm keta takok ngua aoba angur, Kü Tsüngrem, kü chuba tekülemdaki aoba parnoki nguogo.

²⁵Kentenertem tama, kongki awartem tesülen, aser parnok yongtsü nung aiürtem asüm atemer.

²⁶Mungdang tulu nung Tsüngrem moajang, Israel kidong ajaki nenok KIBUBAji sangang.

²⁷Parnok rongnung tilaba, Benjamini parnok anir, iba sülen Yihuda tamarenertem telok, aser Zebulun aser Naftali tamarenertem telok.

²⁸Oh Tsüngrem, ne tashi jazükang, ne tashi tait koba agi onok atema inyak aji sayuang.

²⁹Yirusalem nung ne tenla ki ali nung, chubatemi ne dangi sempet bener arutsü.

³⁰Rangbangnü nung aliba shiruruji arürjang, oda nashi pungchi aser techanu nübur telokji, shiri taribi asoshi nisung dak ajemshir; raratsü jangraba nüburtemji prokshidakjang.

³¹Ijip nungi yongmen bener arudakjang, Ethiopiai la teka Tsüngrem dangi raksadakjang.

³²Oh alima yimlitem Tsüngrem dang tenang, Kibuba nüngsang ken tenang. (Selah)

³³Lipok nungi aliba anüngdak shibai asanger, angang, pai pa ola yoker, Pa ola tulu.

³⁴Tsüngrem tashi tait indang metetdakjang, shiba merenba Israel madak lir; aser pa tashi anüngtem madak lir.

³⁵Pa Tsüngrem na tekülemdaki arudang koda tetsübutsüka lir, Israel Tsüngremi pei nübur nem tashi aser ain agütsür. Tsüngrem temoatsüba süang!