Read njo TENÜNGSANG KEN 69 Bible Online

TENÜNGSANG KEN 69 - njo bible

TENÜNGSANG KEN 69

¹Ni kümzükang, Oh Tsüngrem! Kechiaser kü tekong tashi tzü agi nungbangogo.

²Ni lishi tarok nung asonger, kong tetsüng ajemetdak maka. Ni tzü tarok daki arua lir, aser tzümetsüngi ni atsüngbanger.

³Ayimtenba agi ni aniseter, aser kü trok akonger. Kü Tsüngrem teyari atadang kü tenük agi metizüker.

⁴ Kecha masü nung ni sempar kü kolak ku dang nungia timba kümogo; kecha masü nung ni samatsütsü bushirtemji aika kümogo. Ni mauyaba oset ka parnoki kü dang nungi akhanger.

⁵Oh Tsüngrem, nai kü temenentem metet, ni shisa makaba nai meteta lir.

⁶Oh Temeranger KIBUBA Tsüngrem, shiri ne dak imlar, parnokji ni ajanga mak tesüdaktsü, Oh Israel Tsüngrem, shiri na bushir, parnokji ni ajanga maksüi teidaktsü.

⁷Kechiaser na atema ni tarürtsüba aremzükogo, aser maksüi küjak nembangogo.

⁸Kü adianutem madang ni aener ka ama, aser kütsü chir rongnung ni bendanger ka lir.

⁹Kechiaser ne ki asoshi jangraba agi ni chimar, shiri na mezüngmeshiogo, parnok mezüngmeshiba kü dak tongogo.

¹⁰Kodang ni tanela nung ajeb aser lumi, parnoki iba asoshi ni mezüngmeshi.

¹¹Kodang anem süji kü sobutsü kümdaktsü, parnok asoshi niji menüdong ka aküm.

¹²Shir süngkhüm nung amener, parnoki kü indang jembir, aser yi agi mesepertemi ni agi ken mejemer.

¹³Saka ni asoshibo, Oh KIBUBA, mapang shitak nung kü sarasadem ne dangi yoktsü, Oh Tsüngrem, ne temeim yimlibilem jenti yari kü dang langzüangma.

¹⁴Lishitsüng nung asongba nungi ni kümzükang, aser kü tsükchir nungi ni kümzükang aser tzü tarok nungi ni kümzükang.

¹⁵Tzümetsüng agi ni tatsüngbangdaktsü, mesüra tzü taroki ni temeyokdaktsü mesüra kanglai pei tebang kü dak teshibangdaktsü.

¹⁶Kü dang langzüang, Oh KIBUBA, kechiaser ne temeim yimlibilem tajung lir, ne taochi jenti yari kü dangi meyipang.

¹⁷Ne tenzüker nungi ne tejak temiim, Kü dang yakta langzüang, kechiaser ni timtem nung lir.

¹⁸Ni anasa arung aser ni kümzükang, Kü tsükchirtem nungi ni kümzükangma.

¹⁹Nai kü maksü aser tatalaba aser ni mezüngmeshiba, item ajak metet, nai ajak meteta lir.

²⁰Mezüngmeshi agi kü mulung raksaogo, anungji ni tasü maiti kümogo; Kü dang aria bilemtsürtem ni bushir, saka shinga maliasü; ni sünepdaktsütsü bushi, saka ni shinga mangu.

²¹ Parnoki chiyungtsü melena mim agütsü, aser tzüradang parnoki tasentzü agütsü.

²² Parnok langbangji parnok asoshi sang ka kümdakjang, aser parnok den asemertem asoshi sang ka kümdakjang.

²³Parnoki kecha mangutsüsa parnok tenük manga kümdakjang, aser parnok teperemi maneni atentendakjang.

²⁴Ne terasaba parnok dak meküplokjang, ne ain tesashi agi parnok menepdakjang.

²⁵Parnok talidak azüngmeyak kümdakjang, parnok süki nung shinga telidaktsü.

²⁶Kechiaser nai shiba dak azük, parnoki pa rishikangshir; aser nai shir yirutsü, parnok tekangshi indang parnoki ashir,

²⁷Parnok tai madak tai enlokjang; ne tekümtet nung parnok tetendaktsü.

²⁸ Taküm kaket nungi parnok aidokjang, aser temeshipur den tezülusem.

²⁹Saka ni timtem aser tejashi nung lir, Oh Tsüngrem, ne tekümteti ni kümzükang.

³⁰Ken agi ni Tsüngrem tenüng asangtsü, aser tenüngsang agi ni pa ulutsütsü.

³¹Aji KIBUBA asoshi nashi pungchi ka, oda tezü aser temesüla atenba nashi pungchi tenlaba dang nungi tepelaba alitsü.

³²Tajemrepba purtemi aji ngua pelatsü, nenok shiri Tsüngrem bushir, nenok mulung asentenshidakjang.

³³Kechiaser KIBUBAi sensaker dang teti angar, aser par nübur shir tepuokdak lir, parnok mezüngmeshi masür.

³⁴Anüng aser ali nati, tzüyim aser yangji ayazüba ajaki pa sangang.

³⁵Kechiaser Tsüngremi Zion kümzüktsü, aser Yihuda yimtitem yanglushitsü, pa nüburtemi aji agitsü aser yangji alitsü.

³⁶Pa tenzükertem chirtemi aji senmang amangtsü, aser shiri pa tenüng meimer parnok yangji alitsü.