Read njo TENÜNGSANG KEN 7 Bible Online

TENÜNGSANG KEN 7 - njo bible

TENÜNGSANG KEN 7

¹Oh KIBUBA kü tsüngrem, ne dak ni jenoker. Shirnokisa ni arishir, parnok ajak nungi ni kümzükangma.

²Aji oda mesüra parnoki kü taküm molusongzüi shisatsüba ama, tekümzüker shinga meli-i anüka shisatsütsü.

³Oh KIBUBA, kü Tsüngrem; ni ya inyaka lira aser kü dak tai lira,

⁴kü dang yimjung nung aliba tembar ka anema ni tai inyaka lira, mesüra kecha masü nung kü tsükchir meyong rakzüka lira,

⁵tsükchiri kü taküm arishidakjang aser ni agidakjang. Hau, pa nem kü taküm agidakjang aser kü khonang auyi nung lidakjang. (Selah)

⁶Ne ain adok nung aramesoang, Oh KIBUBA. Kü tsükchirtem mit adok anema nai noktakang. Ni asoshi aramesoang, Oh KIBUBA, kechiaser nai ochiji aginür.

⁷Adenshia aliba nüburtemji na anasa noktakdakjang, Parnok madak temalen nungi yimsü süang.

⁸KIBUBAi nüburtem o bendanger. Oh KIBUBA, kü temeshiba yari aser, kü tsüngchiba yari o bendangangma.

⁹ Oh temeshiba Tsüngrem, shibai shisatsü aser temulungjang bushir, temenenpur mapatemji tatem kümdakjang, aser temeshipur kümzüka yuang.

¹⁰Tsüngremji kü jong lir, shibai temulung tindanger kümzüker.

¹¹Tsüngremji ochi obendanger lir, shibai anogoshia temenenpur anema rasar.

¹²Nisungi temulung memeyipra, pai pei nok arangshitsü. Pai pei lijak azüa arua renemtsü.

¹³Pai mim aketba nok o nü renemogo, pai mi aketba lijak renemogo.

¹⁴Ajiang pa temenen agi mashisa lir, aser tamajung agi mashisa küma tiyazü aser lendong soogo.

¹⁵Shibai kangla ka tangar asoshi yanglur, pai yangluba kangla nungji pa asonga lir.

¹⁶Pa mapa tamajung pa dangi meyipa shilanger. Pa sentong tamajung pa tekolak nung atemer.

¹⁷Pa ochiba yari ni KIBUBA nem tenüngsang agütsütsü, aser Tematiba KIBUBA tenüng nung ni ken atentsü.