Read njo TENÜNGSANG KEN 71 Bible Online

TENÜNGSANG KEN 71 - njo bible

TENÜNGSANG KEN 71

¹Oh KIBUBA, ne dak ni jenoker, Ni kodanga taakdaktsü.

²Ne temeshiba nung ni kümzükang aser yariang; Kü dang angang aser ni kümzükang;

³Na kü jenokdak lung süang, ni kümzüktsü asoshi tashi tait mitsa, kechiaser na kü lung aser kü mitsa.

⁴Oh kü Tsüngrem, tamajunger kabu nungi, ni kümzükang, ochimashir aser temenenpur kabu nungi ni kümzükang.

⁵Na kü teimla lir, Oh KIBUBA, Oh KIBUBA, asangwa nungi na kü mulung alemdak.

⁶Taso dang nungi ni ne dak metaloker, kütsü nu menden nungi ni agitetbaji na lir; Maneni ni na asangtsü.

⁷Aika atema niji tesüngmangtsü ka lir. Saka na kü jenokdak tashi tait.

⁸Anogo tepiyong ne nüngsang, aser na tushiba agi kü bang sünga alitsü.

⁹Tambur akümdang nai ni tesendok, tashi makai akümdang nai ni senzüka teyutsü.

¹⁰Kechiaser kü tsükchirtemi ni anema jembir, shiri kü taküm asoshi miter, parnoki külemi bangjemer.

¹¹Parnoki ashir, “Tsüngremi pa sentokogo, arishiang aser pa puang; kechiaser pa kümzüktsü shinga mali.”

¹²Oh Tsüngrem ni nungi pila-a teli; Oh kü Tsüngrem, ni yaritsü kara-ang.

¹³Shiri ni arishir, parnok maksü nung samadakjang. Shiri ni kangshitsü bushir, parnok tatala aser maksü agi süngdakjang.

¹⁴Saka nibo maneni imlatsü, aser tali tali na asangtsü.

¹⁵Kü tebangi ne temeshiba indang, aser ne tekümtet indang anogo tepiyong ashitsü; kechiaser itemji ni angatettsüba dang nungia tali.

¹⁶Ni KIBUBA Tsüngrem tashi tulu tenüng sanga arutsü. Ni ne temeshiba, oda ne indangji dang ashitsü.

¹⁷Oh Tsüngrem, kü asangwa mapang nungi nai kü dang sayu; aser tang tashi ne tesüngmangtsü mapatem indang ni sangdongogo.

¹⁸Tang, Oh Tsüngrem, ni tambur aser kupu pua aküm nung nai ni tesendokma, taruba pututem dang ni ne tashi aser uluba indang metetdaktsütsü.

¹⁹Ne temeshibai anüngtem atonger. Nai mapa tulu inyakogo, Oh Tsüngrem, na mesüka shiba lir?

²⁰Na shibai lendong timtem tulu aika kü nem ngudaktsüogo, nai tanaben ni sakdaktsütsü; ali tarok nungi nai ni tanaben anitettsü.

²¹Nai kü khonang rendakjang, aser tanaben ni sünepdakjang.

²²Oh kü Tsüngrem, ne temulung lemtetba indang ni tzürang kongki agi ne tenüng asangtsü, Oh, Israel Temeshisang, kongki agi ni ne nüngsang ken atentsü.

²³Kodang ni ne nüngsang ken tendir, kü tebang mechi-i tepela agi ayimtentsü; aser nai alangzükba takümi kanga pelatsü.

²⁴Kü temeli-i anogo tepiyong ne temeshiba teyari indang jembitsü; kechiaser shiri ni yirutsütsü bushi, parnok tatala nung mak süogo.